KUCHING: Haribulan 11 Disember 2013 tauka 11.12.13 nyadi hari pilih ba sekeda orang ke deka nirika rumah tangga enggau ngintu hari nanggam pengerindu.
Nitihka tinjau Utusan Borneo dalam laman rama Facebook (FB) nyauka serampur magang bala mandangka komen bekaul enggau haribulan nya.
Ku seiku pengereja pengawa ba opis perintah ke semina deka dikangau enggau nama Jay Amin madah, haribulan tu hari ke chukup engkeman kelebih agi ngagai raban ke benung nanggam pengerindu kelimpah hari ke chukup betuah ngagai sida ke deka nirika rumah tangga.
“Haribulan tu (11.12.13) hari ke chukup besejarah dalam seumur idup kelebih agi ngagai sida ke deka nirika rumah tangga laban haribulan nya muntang dikeingat kelimpah dikearap ulih mai tuah,” ku iya madah ngagai Utusan Borneo lebuh dipinta meri komen senentang pekara nya, kemari.
Ba Bandaraya Kuching aja, dua puluh empat (24) pasang laki bini udah ngerejister sereta nyain surat tikah ba Opis Pengerejister Bansa (JPN) Nengeri Sarawak pampang Pengerejister Kawin enggau Sarak, di Simpang Tiga ditu kemari.
Sida madah, haribulan tu (11.12.13) nyadi haribulan ke betuah laban nya semina datai sekali dalam seumur idup.