Jaga nama manah profesyen perubat

0

KUCHING: Pengereja pengawa di sektor perubat dipinta meri servis ti pemadu engkeman ngagai orang ti sakit ngambika enda ngenyaika nama pengawa profesyenal nya.

Menteri Muda Dagang Temuai, Datuk Talib Zulpilip (gambar) madah,orang mayuh ulih meri peragam ti positif ngagai servis enti mentas lebuh ngubat orang sakit.

“Servis ti engkeman amat diguna sereta patut dikemeratka, enti enda mentas dia peragam orang mayuh ngagai servis ti disediaka deka negatif sereta ngenyaika nama diri empu,” ku iya.

Iya mansutka pekara nya lebuh bejaku ngarika Menteri Pengawa Berumah enggau Menteri Dagang Temuai Datuk Amar Abang Johari Tun Openg ba pengerami bejadika Persidangan Tahunan Persatuan Perubatan Islam Malaysia (IMAM) di Hotel Merdeka Palace ditu kemari.

“Aku kala meda enggau mata aku empu maya berubat ba sebengkah sepital iya nya pengereja pengawa iya ninggika jaku ngagai seiku pesakit,” ku iya. Talib madahka meri servis ti engkeman ngagai orang sakit ulih ngangkatka nama profesyen nya.

Nambahka nya iya madah, pengereja pengawa patut ngembuan sereta ngemeratka integriti.

“Intergriti amat beguna ngambika pengawa ti dipejalaika ulih dikereja enggau manah sereta lurus baka ti dikemeranka Rasulullah SAW,” ku iya.

Kelimpah ari nya iya madahka nengah servis ti engkeman dalam bidang perubat ulih ngenyakahka agi penumbuh ekonomi bepelasarka dagang temuai pengerai di nengeri tu.

“Sarawak diatu nyadi palan dagang temuai bepelasarka pengerai beduduk ari pemansang enggau penambah perengka perubat ke bisi ditu. “Nya alai, aku ngarapka kita semua bejalaika tanggungpengawa enggau manah ti ulih mai pemansang ngagai Sarawak sereta Malaysia,” ku iya.

Bisi datai ba pengerami nya Presiden IMAM Prof Datuk Dr Abd Rahim Mohamad, Presiden PERKIP Sarawak Azhari Sobet enggau ke bukai.