Makai Malam Reunion penumbuh Ke-50 SMK Luar Bandar Sibu 8 March

0

SIBU: Gerempung Ex-Nembiak Sekula Sekolah Menengah Kebangsaan (SMK) Luar Bandar Sibu deka ngatur Pengerami Makai Malam Reunion beserimbai enggau nyambut penumbuh Ke-50 sekula nya ba Hotel Kingwood kena 8 March, 2014.

Chairman pengatur pengerami, Sammy Ngelambai madah, program nya deka dipungkal enggau aktiviti nanam pun kayu urung pukul 8 pagi ba laman SMK Luar Bandar Sibu.

“Pengerami makai malam diperambu berengkah pukul 7 malam. Pengerami nya dirichahka agi enggau penatai Penyanding Penemu Gerempung Ex-Nembiak Sekula SMK Luar Bandar Sibu, Kaban Kunsil Nengeri (ADUN) Jemoreng, Abu Seman Jahwie.

“Kelimpah ari nya, mega disadang datai ngulu pengerami iya nya ADUN Daro Murni Suhali enggau Panglima 9 Briged, Brigadier Jeneral Muhammad Daniel@Damien Abdullah ke mega seiku nembiak ke kala belajar ba sekula tu (SMK Luar Bandar Sibu),” ku iya madah ngagai pemberita ditu, kemari.

Sammy madah, tuju sida ngatur program tu dikena ngerapatka agi kaul ba semua raban nembiak sekula ke kala belajar ba SMK Luar Bandar Sibu.

“Kitai deka nyendiaka sepenyampau 120 buah mija ngagai barang sapa ke deka ngulu pengerami makai malam tu,” ku iya.

Sebarang tanya enggau penerang ke silik tau betelefon ngagai Sammy Ngelambai ba lumur 013-8184540, Penghulu Enyang Menchul (019-8162847), Raphael Ampi (019-2221250), Steven Rom (013-8183855) enggau Pengajar Busang Bedindang (013-8088367).