S’wak patut ngembuan mayuh orang ti ulih diteladan

0

Ngambika bisi ditunda raban nembiak rebak baru enggau dudi, nyadi penyambung pemansang menua

KUCHING: Nengeri tu patut ngembuan mayuh ikon tauka orang ti ulih diteladan ngambika bisi ditunda raban nembiak rebak baru enggau dudi.

Menteri Muda Pemansang Raban Nembiak (Menua Pesisir) Datuk Dr. Stephen Rundi Utom madah, nya alai rayat Sarawak patut nyukung sereta meri kerejasama ngagai semua atur program ti diungkup ngagai raban nembiak nengeri tu.

Kebuah pia ku iya laban nembiak rebak baru enggau dudi nyadi penyambung pemansang menua jemah ila.

Iya mega bepenemu nengeri tu patut ngembuan mayuh agi raban nembiak ke ulih dichunto ke nyulut dalam mayuh bengkah pekara, ti sama ulih ngangkat enggau ngemansangka agenda menua.

“Nengeri kitai patut ngembuan mayuh ikon, sistem mentor sereta orang ke ulih diteladan ngambika ulih dikemegahka rebak baru enggau dudi.

Ambika banding kitai bisi Pandelela Rinong ti nyadi ikon dalam pekara lumba enggau main.

“Nya alai, kitai minta semua rayat Sarawak sama meri kerejasama ngagai atur program ti dipejalaika dikena ngemansangka raban nembiak enggau agenda menua jemah ila.,” ku iya bejaku lebuh bejadika pengerami ‘I Heart Sarawak On Hitz.Fm With KPS (Opis Menteri Pemansang Rama)’.

Dr. Rundi ti nyadi Menteri Muda Perengka Guna Mensia Mayuh ngarika Menteri Pemansang Rama Tan Sri William Mawan Ikom bejadika pengerami nya ti diatur  ba Le’Park (KIRC) ditu, pagi kemari.

Program nya diatur begulai entara hitz.fm Sarawak enggau Opis Menteri Pemansang Rama (KPS) nyerumba pengawa ngintu Sarawak 50 taun merdeka dalam Malaysia.

“Nengah program ti baka tu kitai ulih ngumpul mayuh penemu tauka runding ari raban nembiak kitai,” ku iya.

Nengah program tauka kimpin nya dikena meransang rayat nengeri tu nunjukka pengerindu enggau penegap ‘Go Beyond’ ke Sarawak. Ikon tu kelai penyulut nengeri lima dekad ti udah ti bepelasarka toleransi, integriti enggau penyulut.

Semengat taluk ke menua patut dikemeratka ngambika ulih nyadika peransang sereta dikemeranka rebak baru enggau dudi.

“Ngarika Radio Astro kami meri terima kasih ngagai KPS, peranak menua lebih agi peninga kami ti udah nyukung sereta nganjung gambar ikon.

Kami berasai temegah ati nyadi sebagi ari pengatur kimpin tu lalu seruran deka nyendiaka muzik ti engkeman enggau kebukai,” ku Menijar Kanan Astro Radio, Sabah & Sarawak Hafiz Nizamuddin.

Sama bisi datai ngulu pengerami nya kemari, Chairman Sarawak Lawn Tennis Assocciation, Datuk Patrick Liew sereta Konsul Jeneral Repbulik Indonesia di Kuching, Djoko Harjanto.