SRI AMAN: Pemansang ungkup rayat ulih diberi belama enti bisi kaul ke rat antara Komiti Pemansang enggau Pengelikun Kampung (JKKK) enggau perintah.
Kaban Kunsil Nengeri (ADUN) Lingga, Simoi Peri madahka, enti nadai kaul ke manah ari kededua piak, mar deka nyungkak tikas pengidup rayat.
“Kami arapka genap iku kaban JKKK di serata menua tu terus meri sukung penuh ngagai perintah ngambi ngemudahka pengawa meri pemansang ngagai kandang menua tu begunaka nya,” ku iya.
Iya bejaku munyi tu ba Pengerami Mantar Krismas 2013 ba Rumah Able Bakar, Kampung Stumbin, Sri Aman ditu pagi kemari.
Ku iya, perintah seruran ngemeratka pengelantang pendiau rayat, kelebih agi peranak menua pesisir nengah pengawa bejalaika projek ti ulih nyungkak tikas sosio ekonomi sida.
Simoi mega meransang bala kaban JKKK ngemeratka pekara pelajar anak ba genturung pendiau sida.
“Pekara pelajar anak kita patut dikemerat laban nya meh ti deka nyadi senyata enggau pesaka ke pemadu berega dikena sida neruska pengidup jemah ila,” ku iya.
Sama bisi ngulu pengerami nya, Pengari Menteri Pemansang Orang Indu, Ruang Bilik enggau Mensia Mayuh ke mega Kaban Parlimen Batang Lupar, Kaunsilor Kunjang Nanang, Pemesai Khas Simoi, Nassir Johan enggau bala bukai.
Berebak enggau nya, Simoi lalu nyuaka geran RM11,800 ngagai 25 buah rumah panjai ba kandang menua nya ngambika bisi dikena sida nyambut Krismas taun tu.
Kelimpah ari nya, Simoi mega nyuaka geran RM5,000 ngagai JKKK Rumah Able ngambika bisi kena nganti atap rumah panjai nya lalu RM1,500 diberi ngagai Biro Indu ngambika bisi dikena sida bejalaika pengawa sida.
Kena ngerami program nya, bisi diatur pekit pocho-pocho.