Ngambika sida sama ulih ngasaika penguntung ari atur pemansang ti disediaka perintah
KUCHING: Bisi 90 ruang bilik ti kena bungkur projek Tekat Ai Bengoh ke enggai pindah ngagai Sekim Pengentap Pendiau Baru Bengoh (BRS) dilalau berunding panjai ngambika sama ulih ngasaika penguntung ari atur pemansang ti disediaka perintah.
Pekara nya dibantaika Menteri Muda Pengerai Mensia Mayuh Datuk Dr. Jerip Susil dalam jaku pengelalu pengerami nyuaka kunchi Rumah Mesra Rakyat (RMR) Sekim Pengentap Pendiau Baru Bengoh ti diatur ba Dewan Kampung Taba Sait, Sekim Pengentap Pendiau Baru Bengoh ditu kemari.
Iya ngelalau raban nya ngambika enda mudah teparuk enggau panjuk jaku piak ti nadai tanggungpengawa ke semina deka ngemuntanka pemansang sereta bejai perintah.
Sekeda orang ti nguji malut runding ruang bilik nya (ti enggai pindah), sida patut berunding manah sereta ninjau baru tuju perintah, ku iya.
“Semua kereban tauka perengkaguna ti disediaka perintah (ba BRS) ulih ngangkatka pemanah tikas pengidup, jalai ti manah sereta semak enggau mengeri meri awak ngagai peranak ngiga peluang gawa di mengeri lalu tu ulih munaska penyeranta.
“Kitai (perintah) beterima kasih ngagai ruang bilik ti meri kerejasama lalu deka pindah ngagai endur tu sereta nyukung perintah ti bebendar ngangkatka tikas pengidup rayat.
“Nya alai, ngagai sida ke enggai pindah, aku ngarapka sida ulih ngubah runding sida deka pindah jemah ila laban tuju perintah deka meri pemanah. Anang mudah teparuk ngagai piak ti bisi juluk ngemuntanka pemansang dibai perintah.
“Munyi ti dipadahka ngagai aku bisi 21 ruang bilik ari Kampung Pain Bojong, 35 ruang bilik ( Kampung Taba Sait) enggau 34 ruang bilik ari Kampung Rejoi,” ku iya ti nyadi Kaban Kunsil Nengeri (ADUN) Bengoh.
Ba pengerami nya, Menteri Pengawa Berumah Abang Johari Tun Openg mujur nyuaka kunchi rumah ngagai 52 ruang bilik.
Empat buah genturung pendiau ti kena bungkur projek nya nyengkaum Kampung Taba Sait (58 ruang bilik), Kampung Pain Bojong (47 ruang bilik), Kampung Rejoi (40 ruang bilik) enggau Kampung Semban (59 ruang bilik).
Bisi datai ngagai pengerami nya kemari, Residen Bagi Menua Kuching Abang Shamshudin Abang Seruji, Sekretari Mendam Opis Menteri Dagang Temuai Datu Ik Pahon enggau kebukai.