LANDIK NENGKEBANG: Nor Azreen ngerandau seiku penyereta ba pengelandik ngayam marik sebengkah pengelandik jari.
NGERINDUKA ATI: Nor Azreen (tiga ari kanan) begambar begulai enggau raban penyereta ari Kolej kominiti Kuching.
KUCHING: Festival dagang Kolej Komuniti tikas menua, udah diatur ba Medan Niaga Satok ditu apin ke udah dikena nyendiaka bala nembiak ngembuan runding ba pengawa dagang sereta mega meri peneleba keterubah ngagai sida.
Urung 500 iku bala nembiak ari lima buah Kolej Komuniti di serata menua Sarawak, bisi ngambi bagi ba festival ti keterubah endar diatur nya baka ari Kuching, Santubong, Mas Gading, Betong enggau Miri.
Direktor Komuniti Kolej Kuching, Saidi Japari madah, program nya deka muka peluang dagang sereta meri peneleba ngagai bala nembiak nya.
“Nengah program tu, bala nembiak ulih belajar, ngulihka peneleba ba dunya dagang. Sida deka betapi enggau penguntung sereta pengerugi ba pengawa dagang, nya meh pekara ke amat nyadi dalam pengidup kitai.
Tu deka manah endur ngeringka pemanah ulah, basa, pengarap enggau pengeliat ati, nyadi ketuai sereta gawa beraban,” ku iya madah ngagai pengarang berita lebuh betemu ba festival nya.
Bisi 20 buah bansal endur bejual ke dibuka belabuh ari pukul 8.00 nyentuk ke pukul 5.00 lemai.
Lecturer ke mega Direktor program Komuniti Kolej Kuching, Nor Azreen Ayub madah, nya meh keterubah endar pengawa nya diatur ba palan tebuka. Tu ulih ngajar bala nembiak betemu sereta berandau enggau mensia mayuh kelebih agi pasal pengawa dagang.
Ku iya, program nya mega dibuka ngagai nembiak ari semua bansa kos ti bisi ati ba pengawa dagang. Sida diperansang nyual sebarang produk nitihka pengingin ati sida.
Pemujur sesebengkah bansal bejual nya dikemataka ari segi pengulih asil bejual enggau pemanah gaya sida mandangka produk ke dijual.
Produk ke bisi dijual maya nya baka pemakai enggau ai irup, asil pengelandik jari, gambar, bungai, tepa, gari, DIY (do-it-yourself)enggau sekeda produk bukai.
Opis Dagang Betanam Betupi Perintah Besai (FAMA) udah nyendiaka lot bedagang ke enda bebayar endur bejalaika program nya. Tim ke menang udah ngarika menua Sarawak ba Festival dagang tikas Nasional ke diatur di Melaka kena bulan November tu tadi.
Festival nya dibagi ngagai dua bengkah program ke dipejalaika ngelama dua hari. Ba hari keterubah, bala penyereta diberi seminar ke diatur ba Kompleks Dewan Bahasa enggau Pustaka. Topik ke bibantai maya nya nyengkaum ‘business etiquette and awareness, financial management, entrepreneurship’ enggau sekeda topik bukai.
Sekreteri politik Kepala Menteri ke mega Kaban Kunsil Nengeri Samariang, Sharifah Hasidah Sayeed Aman Ghazali udah bejadi sereta nutup festival nya.