RAJA BUAH: Endur tebuka ba Mait Besai Sibu benung kiruh enggau pengawa dagang bejualka buah nyerumba musin buah.
SIBU: Opis Kunsil Bandar Sibu (MPS) ngelalau mensia mayuh nguna kulit buah rian ke muntang digiga maya ke diatu dikena ngaga baja kompos.
Sapit Chairman MPS Daniel Ngieng Kiong Ann madah, uras kulit rian ulih nambahka penyampau uras ke dilela ba palan endur ngelelaka uras ninting taun.
“Berindik ari nya, kami ngelalau mensia mayuh ke bisi pengelandik ngasilka baja kompos beratika sadang nguna kulit buah rian tu,” ku iya madah ngagai pemberita.
Ku Ngieng, piak opis kunsil nadai pengelandik dalam pekara tu sereta begunaka kerejasama mensia mayuh mendingka tangkan nya kena ngurang penyampau uras kulit rian.
Tandu iya, kerejasama mensia mayuh endang dikelalu dikena ngiga chara ngasilka baja kompos ari kulit rian tu tauka ngena chara ke muntang sereta jampat agi.
“Kitai nemu proses ngasilka baja kompos muntang mimit dikereja orang seseiku ba rumah. Nya alai kami ngansak mensia mayuh ngereja pengawa nya,” ku terang iya.
Ngieng madah, penyampau uras ke nambah ari kulit rian maya tetiap ujung taun sebengkah isu ke mar diputarka piak kunsil.
Taja pia ku iya, piak kaunsil ka pan enda napi penanggul nya ninting taun sereta ngiga chara ke pengabis engkeman kena ngelelaka uras kulit rian nya ari ke muai terus ngagai palan ngelelaka uras.
“Kelimpah kulit rian, buah bemusin ke bukai baka dabai enggau sibau mega nambahka pemayuh uras,” ku terang iya.
Ditanya bisi ke enda pengawa bebuaika kulit rian nengah chara ke enda betul deka nyadi endur nyamuk betelu, Ngieng enda ngenggaika pekara nya nyadi.
Baka uras ke bukai ke tau nakung ai, ku iya, kulit rian mega ulih endur nyamuk betelu enti sema nakung ai.
“Nya alai kami ngansak mensia mayuh ngambika muai kulit rian nya enggau chara ke betul,” ku iya seraya madah kulit buah sibau ke nakung ai mega ulih endur nyamuk betelu.