Ngembuan ati ninding nekul pemansang bansa diri

0

BEJADI: Daniel (dua kiba) mangkung tawak kelai bejadika Projek Jiwa Murni ba Rumah Bayang, Sungai Lengan ditu, ensana. Bisi ayan TR Bayang (kiba) enggau Rusman (lima kanan) sereta bala bukai.

Peranak rumah panjai dilalau enda deka ngelabuhka pangan diri kelebih agi sama bansa

SIBU: Penemu deka ngelabuhka orang bukai tau nempa penusah ngagai diri empu kelimpah nekul pemansang bansa diri.

Jaku nya dibantai Panglima Infrantri 9 Briged Brigadier General Muhammad Daniel @ Damien Abdullah maya bejadika Projek Jiwa Murni ba Rumah Bayang, Sungai Lengan ditu, ensana.

Iya ngelalau rayat rumah panjai ngambi ke enda ngembuan ati bingking enggau pangan diri.

“Penemu deka ngelabuhka pangan diri ketegal ninding meda pemansang orang bukai agi mengkang dikembuan raban bansa Dayak.

“Chara kitai deka ngelabuh ke orang tau nekul pemansang bansa diri,”

“Buai penemu tu lalu berunding baka ni deka ngemansangka diri,” ku iya madah.

Pengawa ke dipejalai sehari nya diatur Rejimen 510 Askar Wataniah (Rejimen 510 AW).

Berebak enggau tu mega, Daniel ngelalau bala apai indai bebendar nyengulaka anak.

Ku iya, semina pelajar aja ulih ngubah pengidup diri empu, ruang bilik enggau bansa diri.

“Nyerumba pemansang kemaya hari tu, kitai ke diau ba rumah panjai anang enda ngansak diri beumba-umba enggau orang bukai enggau naka alah nyengulaka anak nyentukka pemadu pandai.

“Kebuah pia, laban ari pelajar kitai deka nyingkang ke mua bela ngasaika penyenang baka orang bukai ke udah mansang,” ku iya.

Pia mega Daniel ngarapka peranak rumah panjai kelebih agi ke diau ba menua pesisir nyaga pengerai diri.

“Pengidup ti meruan sereta lantang ukai semina bepanggai ba pengaya aja tang pengerai kitai nentuka pengidup diri empu.

“Nya alai, aku ngelalau peranak rumah panjai enda nempia ke pengerai diri enda milih tuai tauka biak,” ku tandu iya.

Bela bisi datai maya program tu iya nya Chairman Komiti Pengatur Left. Kol Rusman Sanip enggau Tuai Rumah Bayang sereta lebih seratus iku bala bukai nyengkaum bisi datai ari rumah panjai ke besemak.