Tali ladat nyilih senggang enggau bemban

ENDA DIJUAL: Poly mandangka sekeda bakul ti udah tembu dianyam.

PEMANAH TIKAI: Sekeda ari tikai ke digaga ngena tali ladat ke udah tembu dianyam.

MUNTANG DIKENA: Poly dipeda benung nganyam bakul ngena tali ladat.

KUCHING: Besenutuk nitihka gaya ubah dunya ti majak mansang ba semua pekara, asil ari pengelandik jari kitai mega nyingkang mansang seraya ti enda ninggalka adat, main asal enggau pesaka lama ke nyadi kelai bansa Dayak kelebih agi kitai Iban.

Pengawa nganyam ke nyadi sebengkah pengelandik jari ke tebal agi dikereja orang indu kitai bansa mega enda tinggal ari arus pemansang dunya ke alai maya ke diatu tikai, timpa, seraya udah dipeda digaga ngena tali ladat (nylon).

Kelia, kitai bansa suah bekenaka bemban, senggang, tali wi sereta buluh tang ketegal rengka nya pedis digiga ba sebelah kampung jeman ke diatu pengudah kitai numbuhka kebun sawit tauka getah ungkup pemansang ekonomi ruang bilik, tali ladat diambika ganti.

Karang serak tu ngenang pasal pengawa tauka pengerindu orang indu kitai bansa nganyam tikai, bakul enggau utai bukai bekenaka tali ladat lalu udah chukup tebilang  ba serata nengeri maya ke diatu.

Tali ladat ulih dibeli ba mayuh kedai di nengeri tu ke alai rega segulung tali nya urung RM50 lalu ngembuan bemacham chura nitihka peneka tauka bungai anyam ti dikedeka ati.

Poly anak Udin, 67, ari Selepong Brangan, Sri Aman ti dikerandau di rumah anak iya di Kuching ditu madah pengawa nganyam ngena tali ladat enda jauh bida  enggau pengawa nganyam bekenaka senggang enggau bemban.

Iya ti udah lama ngembuan pengelandik nya madahka nganyam udah nyadi sebengkah ari pengerindu iya kenyau ari kelia lalu mega dikena ngisi maya lepa nyemaka gaya pengidup orang indu kitai ke diau di rumah panjai.

Poly madah iya nguna timpuh dua minggu nembuka tikai 13 kaki pemanjai sereta 8 kaki pemesai ke alai timpuh nya mega ditentuka bansa bungai tikai.

“Diatu pedis kitai deka nemu senggang tauka bemban, enti bisi pan engka nadai orang ngambi ke kitai. Tali ladat nyadika ganti semua nya ke alai kitai mega ulih ngaga tikai enggau bakul bemacham chura nitihka bungai ti dikedeka.

“Dua gulung tali ladat ulih dikena nembuka tikai ke urung 13 kaki pemanjai enggau 8 kaki pemesai. Enti dianyam ninting hari, tikai mesai nya ulih tembu dalam timpuh dua minggu,” ku iya.

Kelimpah ari nya, iya mega madahka tali ladat ulih dikena ngaga bakul nitihka pemesai enggau chura ti dikedeka.

Iya mega madah ulih ngaga sereta nembu bakul ngena tali ladat dalam timpuh 4 hari.

Tikai sereta bakul ke digaga ngena tali ladat jauh manah ari tikai lama kitai ketegal tali tu ngembuan mayuh chura ti ngujungka bungai ti digaga baka ke idup dipeda mata, tandu iya.

Tali ladat ke dijual dikedai ngembuan bemacham chura baka putih, chelum, kuning, mirah, biru, gadung, unggu, choklet sereta ke bukai.

Poly mega madah tikai ke digaga ari tali ladat bisi pengelebih enti dibandingka enggau tikai ke digaga ari bemban tauka senggang.

Ku iya, tikai nya tau dituchi enggau ai enti bisi kamah lalu tan tauka enda mudah buruk enti kena ai.

Maya ke diatu, iya enda merambu nyual asil pengelandik nganyam tang tebal agi tikai tauka bakul ke digaga ngenan tali ladat diberi ngagai bala anak sereta kaban belayan ke bukai.

Tali ladat engka dipeda kitai sebengkah tali ti tebal agi dikena orang ngikat kutak kelia enggau ke diatu.

Enti diperati ari sukut bukai, iya ke amat tali tu udah nampung pesaka lama kitai bansa kelebih agi ba pengawa nganyam ngambika mengkang dipeturun lalu nyadika kelai bansa Iban.

Bungai ke dipandang ba tikai tauka bakul ke digaga ngarika gaya pengidup kitai Iban lalu deka mengkang dipeda belama.

What do you think of this story?
  • Interesting (100%)
  • Angry (0%)
  • Sad (0%)
  • Nothing (0%)
  • Great (0%)

 

We encourage commenting on our stories to give readers a chance to express their opinions; please refrain from vulgar language, insidious, seditious or slanderous remarks. While the comments here reflect the views of the readers, they are not necessarily that of Borneo Post Online. Borneo Post Online reserves the right not to publish or to remove comments that are offensive or volatile. Please read the Commenting Rules.

Affiliates

 

Supplement Downloads

Member of