KUCHING: Menteri Kanan menua tu nanya nama kebuah nadai sebarang atur tauka lalau diambi Opis Agama Islam Selangor (JAIS) udah sida nyerungkai Opis ‘The Bible Society of Malaysia’ (BSM) lalu ngerampas Buk Kudus, Hari Empat tu tadi ke enda nitihka atur undang-undang.
“Enti amat pengawa JAIS nyerungkai sereta ngerampas Bup Kudus Keristin nya salah laban JAIS ke nadai kuasa ba palan orang ukai Islam laban sida nadai surat pemendar nyerungkai palan nya, nama kebuah nadai sebarang atur diambi ba sida ke nyerungkai palan nya?
“Tang, orang ke bisi hak ngempu Bup Kudus nya ditasat polis,” ku Menteri Pemansang Tanah, Tan Sri Datuk Amar Dr James Jemut Masing madah lebuh iya dikerandau kemari.
Iya madah munyi nya lebuh nimbal jaku ‘Malaysian Bar Council’, iya nya JAIS ke nyerungkai BSM, lalu ngerampas Bup Kudus ke ditulis dalam jaku Melayu enggau Iban ari gerempung nya lalu nangkap tuai-tuai BSM, pengawa ke salah sereta enda nitihka undang-undang.
‘The Malaysian Bar Council’ nambah, JAIS, iya nya sebuah opis kandang menua ejensi Islam nadai hak sereta kuasa ba pengarap tauka orang bukai ke ukai Islam.
“Undang-undang Malaysia betatika kuasa sida iya enda ngira orang nya ari pengarap, tauka bansa bukai. Aku ngarapka opis kandang menua ke bekuasa ngereja pengawa sida iya nitihka ungkup undang-undang, lalu enda ibuh takut tauka milih bulu. Ke salah nya tau ditangkap, tang ke betul nya, anang ngachau orang bukai,” ku Masing.
Iya ngelalau pengawa bansa tu enti dipajakka tauka enda diputar enggau manah, pejalai Malaysia deka nyadi menua ke adil agi jauh endar.
Masing ti mega presiden Parti Rakyat Sarawak (PRS) ngelalau rayat Malaysia meri timpuh ngagai Menteri Besai (PM) Datuk Seri Najib Tun Razak mutarka pekara Bup Kudus ke kena rampas JAIS.
Taja pan, enda nemu kebuah ke bendar Najib enda munyi kenyau berapa minggu tu ke udah, iya (Masing) melaba PM ke enda munyi nya ‘bisi kebuah’.
“PM enda bemunyi nyangka laban bisi kebuah. Aku enda nemu, nama kebuah iya enda bemunyi diatu. Beri mih iya timpuh dulu pasal pekara tu. Ngarapka, enda lama agi iya deka meri penemu iya,” ku Masing.