Terangka kebuah penyuntuk ai di Simunjan enda teputar

0

KUCHING: Kaban Kunsil Nengeri (ADUN) Batu Lintang See Chee How minta ADUN Simunjan Datuk Naroden Majais nerangka kebuah penyadi pengamah sereta penyuntuk bekal ai di sitak Simunjan.

Taja pan Naroden besemaya deka mutarka penanggul suntuk ai nya nengah pelin timpuh panjai, pasar Simunjan sereta genturung pendiau ngelingi nya agi napi penanggul. Naroden mega sapit menteri Pengatur Penatai Pemisi.

“Sapit Menteri nya besemaya deka mutarka penanggul suntuk ai ba tengan taun 2013 lebuh penembu penyambung paip besai ari Gedong dikena mai ai ari palan pemeresi ai di Slabi Serian ke ulih ngeluarka 50 milliun liter ai sehari, ku See.

“Taja pia, pengudah matau penusah nya ke Simunjan kena 6 Januari tu tadi, ukai semina pasar nya sereta kandang menua ngelingi suntuk ai tang mega balat kamur sereta keruh,” ku iya ngerandau pemberita kemari.

Berindik ari nya, Naroden patut nerangka ngagai mensia mayuh kebuah sida betapi enggau penanggul ke enda nemu badu nya.

See mega minta Naroden nerangka kebuah pengawa ngenalamka pegung ai di Gunung Ngeli ka kaya enggau sejarah.

“Pengawa nya ukai semina ngerusah pemanah rampa menua tang masau duit rayat,” ku See.