Pemanah tauka pengenda SUPP begempung enggau komponen BN bukai bepanggai ba sida, ku Wan

0

SELAMAT HARI MAULIDUR RASUL: Dr. Wan Junaidi seraya disempulang Karim (dua kiba) enggau Dr. Abdul Rahman betemu enggau raban bansa Islam maya ngerami Maulidur Rasul ti diatur Komiti Pengelikun Genturung Pendiau Kampung Seberang Hilir. — Gambar Muhd Rais Sanusi

KUCHING: Orang ari luar parti semina ulih meri penemu tauka buah runding bekaul enggau chara mutarka penanggul ke nyadi dalam parti baka ti ditapi Parti Sa’ati Rayat Sarawak (SUPP), ku Sapit Menteri Dalam Nengeri, Datuk Dr. Wan Junaidi Tuanku Jaafar.

Dr. Wan Junaidi dipinta ngenang pasal penemu veteran SUPP ti minta SUPP begempung enggau parti komponen Barisan Nasional (BN) bukai, baka SPDP, iya madahka pemutus nya bepanggai ba raban pemesai tauka ketuai enggau kaban parti nya.

“Tu penanggul dalam parti, enti sema kaban parti ngasaika sida deka begempung enggau parti bukai (BN), nya bepanggai ba sida empu,” ku iya ti mega Kaban Parlimen Santubong.

Iya dikerandau pengarang berita pengudah ngulu pengerami Maulidur Rasul ti diatur Komiti Pengelikun Genturung Pendiau Kampung Seberang Hilir ti diatur ba Dewan Sekolah Kebangsaan Matu Baru ditu, kemari.

Lebuh ditanya sekalika penemu begempung (SUPP) enggau parti bukai dalam komponen BN, iya madahka; “Aku enda nemu sekalika penemu nya manah tauka enda. Parti, sebedau ngaga pemutus  patut betanya penemu ngagai kaban parti, laban nya chara pemadu engekeman,” ku iya.

Penyarut nyadi dalam SUPP bepun ari penumbuh dua bengkah raban ti betuaika Presiden SUPP Tan Sri Peter Chin enggau Chairman SUPP Sibu Dato Sri Wong Soon Koh.

Penyarut nya berupai nyengenda maya baum tiga taun sekali (TDC) parti nya taun 2011.

Pemutus TDC nya, Chin dipilih nyadi Presiden nganti Tan Sri George Chan ti ningkilka diri ari politik ketegal alah maya pengawa bepilih nengeri (2011).

Dalam pengerami Maulidur Rasul nya kemari, Dr. Wan Juniadi di sempulang Menteri Muda Pengawa Berumah ti mega Kaban Kunsil Nengeri (ADUN) Asajaya Datuk Abdul Karim Rahman Hamzah sereta Kaban Kunsil Nengeri (ADUN) Pantai Damai, Dr. Abdul Rahman Junaidi.