PENGAWA MUNTANG: Seiku pengereja pengawa ngetau padi ba umai ngena injin ke jauh ngenyampat sereta ngemuntangka kereja.
KUCHING: Projek Pemansang Industri Beras Bario (BRIDP) ari baruh Palan Pemujur Ekonomi Nasional (NKEA) ti balat dikearap, nyangka deka ngeluarka asil ba suku keterubah taun tu.
Bario Ceria Sdn Bhd (BCSB), sebengkah kompeni ke besaup ngemansangka projek nya udah berengkah ngetau padi nya kena 2 Januari tu tadi pengudah ngemujurka pengawa ngachap dandang umai nya ngena ai nengah chara pemadu moden.
Direktor Pengatur BCSB Thomas Hii madah, kompeni nya deka besaup enggau Opis Menteri Pemansang Pengawa Betanam Betupi Moden sereta Opis Betanam Betupi ngelakuka asil projek NKEA tu ngagai mensia mayuh.
“Pengawa tu dipelabaka deka dipejalai ba suku keterubah taun 2014 nengah atur bejualka beras Bario tulin ari baruh program Sekim Setipikit Beras Bario, Opis Betanam Betupi.
“Kitai mega ngarap, mensia mayuh ulih nyepi beras Bario tulin kelimpah ari ngenataika penguntung ngagai peranak menua ditu ba dagang nya,” ku iya, ensana.
Hii mega arap, projek nya nyadi penyungkak asil pemisi ke diulih dibandingka enggau sebedau tu.
Tebal orang bumai dia gaga ati enggau program nya ti udah ngayanka pemujur ba pengawa ke dikemeranka sida.
“Taja bisi sekeda peranak menua dia enggai masuk program nya tang BCSB pechaya nengah pemujur sereta penyungkak asil ke dipeda, pengujung… sida ke enggai nya deka masuk dalam program nya ila.
“Kami pechaya bendar, asil taun tu jauh manah ari ke udah, tambah mega pengawa bekenaka injin betanam padi dia mayuh ngelempungka tulang seraya teulihka asil ke jauh tinggi ari chara lama,” tandu iya.
Iya mega ngarapka projek tu deka nyadi chunto ngagai perintah lebuh merambu pemansang ke dikearap ulih nguntungka peranak menua baka ke ditampai ketuai menua lebuh merambu projek NKEA ari barum GTP.
Projek ke beungkus RM17 miliun tu mungkur pengawa ngaga tujuh buah tekat ai dikena ngachapka umai nya, ngerata dandang umai, ngaga jalai, paip ai, pengawa nesap tanah umai pemesai 200 hektar kelimpar ari tempat endur nyembi sereta nginjin padi.
Kena bulan November taun nyin kemari, Sapit Kepala Menteri Datuk Patinggi Tan Sri Alfred Jabu madah, pemesai 140 hektar ari 200 hektar tanah bungkur projek nya benung dikereja endur nanam padi Bario sereta dikearap nyungkak asil maya pengawa ngetau bulan Januari taun tu.
Enti semua tanah ke dibungkur atur pemansang nya tembu ditanam magang, Jabu ke mega Menteri Betanam Betupi Moden madah ngagai Kunsil Nengeri, asil beras Bario deka nambah tiga ngagai empat kali lipat iya nya urung 300 tan metrik setaun.
Beras Bario ke ditanam di menua chelap baka ba kandang menua tinggi Kelabit ngembuan peminta tinggi berindik ari pemayuh undan mineral enggau vitamin.