KUCHING: Program bejalai surut tauka ‘Imagine Retrowalk’ sepenyauh satu (1) kilometer (KM) nagit lebih ari 1,000 iku penyereta dikena mechah sereta nempa rikod baru dalam Guiness World Record.
Menteri Pemansang Rama, Tan Sri William Mawan Ikom madah, ngarapka lebih mayuh peranak Sarawak nyereta seraya nyukung program nya.
Iya madah, program nya diatur mega sebengkah ari program pengasih dikena mantu orang ti patut tauka begunaka bantu.
Endang tusah enti kitai bejalai surut tang enggau sukung bala kaban sereta peranak Sarawak ke mega bejalaika pengawa ti sebaka, ulih ngurangka penusah, ku iya.
“Bulan Oktober 2014, lebih ari 1,000 iku peranak Sarawak dipelaba deka masuk program bejalai surut sepenyauh 1KM. Dikearapka ulih mechah sereta nempa rikod baru dalam Guiness World Record.
“Bejalai surut kena mechah rikod Guinness World Record tu sebengkah chunto ke manah ti tau dikereja raban bansa ari mayuh bengkah pengarap ngambika nyapai tuju ti tau ngasuh dunya muji pemujur kitai,” ku Mawan dalam jaku iya ti dibacha Menteri Muda Pemansang Nembiak, Datuk Abdul Karim Rahman Hamzah.
Karim ti mega Menteri Muda Pengawa Berumah nganti Mawan bejadika Program Bejalai Surut ti diatur 1BFF ba Plaza Merdeka ditu, lemai kemari.
“Laban pengawa tauka penusah ti sebaka dipesaup dikereja bala mayuh, dia tau nyadi nyamai dikereja. Tu mega dikereja ketegal pengasih iya nya kitai empu nentuka sapa ke deka nerima bantu,” ku iya.
Nambahka nya iya madahka program ke sebaka kala digaga di China sereta dipasuk urung 1,000 iku penyereta lalu ngaga rikod ti dipasukka dalam rikod dunya.
Orang mayuh ke deka masuk program tu semina dipinta mayar RM50 aja.
Nitihku Chairperson Pengatur, Winnie Lim, pengawa ngerejister berengkah diatur 23 Januari ngagai ujung bulan September 2014, tiap ujung minggu ba Plaza Merdeka.
Program ti ngena rambai jaku “A World Record Event At Your Doorstep” tu deka diatur kena 11 Oktober 2014 di padang Jubli MBKS,” ku Winne.
Sama datai ba pengerami nya kemari, Menteri Muda Dagang Temuai Datuk Talip Zulpilip, Datuk Bandar Dewan Bandara Kuching Utara, Datuk Abang Abdul Wahap Abang Julai enggau ke bukai.