Wednesday, April 14

Penyampau TR di DUN Ngemah deka dikemayuh

0

KANOWIT: Penyampau tuai rumah (TR) di sitak Kunsil Nengeri (DUN) Ngemah deka dikemayuh dudi ila.

Ku ADUN Ngemah, Alexander Vincent madah, nya berindik ari penyampau peranak rumah panjai ti majak mayuh.

“Enti penyampau peranak rumah panjai majak mayuh, sida dipelabaka ngembuan penemu ke bebida ba sekeda pekara ti ngujungka sida enda ulih berakup enggau pangan diri.

“Enti sema bisi nyadi penyerekang penemu, sida dipelabaka pindah ari rumah panjai ke diatu sereta ngaga rumah panjai baru ti ngujungka sida nyiri Tuai Rumah sida empu.

“Tambah mega, elawin bala ketuai raban bansa nyengkaum Tuai Rumah diatu udah ditikika,” pia ku iya bejaku ba sebengkah Randau Begulai enggau 56 iku Tuai Rumah ba DUN Ngemah di Bilik Aum Opis Pelilih Mit Kanowit, kena Hari Lima nyin tadi.

Iya bejaku munyi tu lebuh ngenang senentang lapan iku Tuai Rumah ke mengkang nerima penyampau elawin lama, taja pan sida udah nerima surat chiri.

Ku Alexander, iya nemu tanggungpengawa nyadi ketuai ukai lempung lebih agi enti sida enda  dibayar elawin.

Berebak enggau nya, iya arap semua ketuai raban bansa di Ngemah chakah bejalaika tanggungpengawa enggau ati ke lurus.

“Kita ti dichiri perintah nyadi ketuai ba tikas nembiak redak laban perintah udah arapka kita,” ku iya.

Sama bisi ngulu randau nya, Pengulu Barnabas Angkis, SAO Kanowit, Harmon Gilbert Sinju.