KUCHING: Penyampau penerima bantu tiap bulan ari Opis Pengintu Pengelantang Raban Bansa Nengeri Sarawak (JKMNS) nambah tiap taun, ti nunjukka perintah beratka pengelantang rayat.
Menteri Pengintu Pengelantang, Orang Indu enggau Pemansang Ruang Bilik (KKWPK), Datuk Fatimah Abdullah madah, bantu tiap bulan ngagai orang ke patut endang sebengkah ari Key Performance Index (KPI) KKWPK nengah JKMNS.
“Bepelasarka rikut penyulut penyampau kes tauka orang seseiku ti diberi bantu tiap bulan ari JKMNS, enti dibandingka tiap taun endang bisi nambah.
“Ambika banding, ba taun 2008 kitai bisi meri bantu tiap bulan ngagai 15,581 iku penerima tauka orang ke patut dibantu, 26,406 penerima (2009); 40,220 penerima (2010); 43,543 penerima (2011); 51,157 penerima (2012) enggau taun 2013 bisi 56,072 iku penerima bantu tiap bulan enggau ungkup belanja lebih RM164 juta (taun 2013).
“Key Performance Index (KPI) JKMNS iya nya bantu tiap bulan enda tau enda diberi ba minggu keterubah tiap bulan,” ku iya.
Fatimah mansutka pekara nya lebuh bejaku ba Majlis Malam Penghargaan KKWPK (Penyerahan Tugas Rasmi Pengarah JKMNS & Biro Wanita), ti diatur ba Sarakraf Pavilion ditu, malam ensnus.
Bejaku baru iya madah, tuju penumbuh opis menteri (KKWPK) endang meri bantu ngagai rayat ti amat begunaka bantu, nengah macham program ti diatur.
Ku iya, JKM mega diberi tanggungpengawa mantu orang ti tasah ampuh bah, angus sereta tanah tusur kelimpah ari ti nyaga pengelantang orang tuai, Orang Nyelai Pendiau (OKU), anak mit enggau ke bukai ti bekaul.
Kelimpah ari nya, Fatimah lebuh ti ngenang tanggungpengawa Biro Indu, iya madah, (Biro Indu) deka mekuh ngagai orang indu dalam bidang ekonomi kelimpah ari mayuh pekara baru deka dikemeranka dalam taun tu.
Ba pengerami nya kemari Fatimah ngemataka pengawa nyerahka tanggungpengawa tauka dokumen JKMNS ari mantan direktor JKMNS Noriah Ahmad ngagai direktor baru JKMNS Abang Shamsudin Abang Seruji.
Fatimah mega ngemataka pengawa nyerahka tanggungpengawa tauka dokumen Biro Indu ari mantan direktor Biro Indu Norjanah Razali ngagai direktor baru Biro Indu, Noriah Ahmad.
Mantan Biro Indu Norjanah Razali gawa ba opis kepala menteri di baruh seksyen baru.
Sama bisi datai ngagai pengerami nya malam ensanus, Menteri Muda Pemansang Ruang Bilik enggau Pelajar Anak Mit Rosey Yunus enggau Menteri Muda Pengintu Pengelantang Robert Lawson Chuat.