ENGKILILI: Seraban 165 iku ari 27 rumah panjai ba kandang Kunsil Nengeri (DUN) Engkilili masuk ba Program Latihan & Pelancaran Pasukan Bertindak Kecemasan Komuniti (Community Emergency Response Team) (CERT) Engkilili ke diatur ngelama tiga hari ba rumah panjai Roy Entalai, ditu, kemari.
Pengerami program nya udah dipenyadika DUN Engkilili Dr Johnnical Rayong anak Ngipa.
Lebuh ke bejaku, Dr Rayong madahka tuju program nya diatur ngambika bisi kena ngiri penemu ngagai mensia mayuh sentang penusah ngenyit ke nyadi ba kandang pendiau sida.
Ku iya, nengah raban CERT Engkilili nya, peranak rumah panjai tauka ba kampung ulih nyaup nyeliah sereta ngurangka pemedis enggau pengerugi reta tengkira ketegal penusah ngenyit sebedau penatai raban profesyonel.
“Raban tu dilatih sereta diberi semua pengelandik ke bekaul enggau penusah ngenyit sereta ulih meri bantu jampat ba palan penyadi nya, seraya ke nganti raban penyelamat ari ijinsi bukai datai,” ku iya.
Ku Dr Rayong, pengawa numbuhka CERT tu beguna amat ngagai peranak rumah panjai tauka kampung laban kelimpah ari raban penyelamat, sida mega deka nyadi jematan penyambung antara ketuai, rayat enggau perintah.
Berebak enggau pengerami nya, Dr Rayong ngungkupka belanja Projek Mit Pemansang Menua (MRP) sama bela RM5000 ngagai JKKK Rumah Panjang Roy Entalai Selindung Ulu enggau Biro Indu sida.
Sama bisi ngulu pengerami nya, Direktor Unit Pengelikun Nengeri Datu Dr. Haji Yusoff Nook, Kepala Polis Pelilih Mit Lubok Antu, DSP James Jonathan, sapit DO Lubok Antu, Langgong anak Wassam enggau sekeda bala ketuai raban bansa ba kandang menua Engkilili.