PENGGI NUAN: Abang Johari (tiga kiba) nyuaka setipikit ngagai seiku penyereta aum “Joint-Strategic Transformation Retreat” seraya dikemata raban menteri muda enggau pemesai bukai.
Perambu 2014 tu dikena ngungkupka raban orang ke ngembuan penyelan penatai pemisi palan endur diau
SANTUBONG: Opis Menteri Pengawa Berumah deka ngaga mayuh agi flat ba kandang mengeri taun 2014 ungkup orang ke ngembuan penatai pemisi ke baruh sereta numbas pemesai.
Menteri nya, Datuk Amar Abang Johari Tun Openg madah, ketegal pemayuh orang ti udah nguan mengeri, rega retanah nyengkaum rumah majak niki lalu ngasaika rumah flat nyadi sebengkah atur ke tau mutarka penanggul orang ke kurang penatai pemisi.
“Kitai deka bisi mayuh agi rumah flat digaga di kandang mengeri pengudah rega tanah ti majak niki.
“Enti seika tanah semina chukup endur lapan unit rumah aja, kitai nyadang ngaga rumah flat ulih nyendiakka mayuh agi rumah.
“Atur tu mega deka nyendiakka rumah ngagai orang ti mindah ari menua pesisir ti nedat kandang mengeri,” ku iya ba siti aum pengarang berita pengudah “Joint-Strategic Transformation Retreat” ke diatur di Damai Beach Resort ditu, kemari.
Dikena ngepunka pengawa nya, Johari madah tiga buah blok rumah flat deka digaga ba taun 2014 tu ba Tabuan Jaya besemak enggau Sekula Bandar Kuching No.2.
“Tiga buah blok rumah flat ke beungkus RM40 juta deka nyadi projek pengepun opis menteri pengawa berumah.
‘Rumah flat 12 ringkat tu deka diintu sebengkah ejensi ke dipilih lalu disaup opis kaunsil kandang menua,’ku iya.
Iya netapka unit rumah flat nya ila tau dibeli ruang bilik ke ngembuan penatai pemisi kurang ari RM5,000 sebulan ke alai bantu lun deka disedia.
“Joint-Strategic Transformation Retreat” ke diatur opis menteri pengawa berumah bela digulu Housing Development Corporation (HDC) enggau Daya Builders Sdn Bhd.
Aum diatur enggau tuju ngenegapka pejalai sistem pengawa berumah bepelasarka Housing Development Ordinan (HDO) 2013 enggau HDC Ordinan (Amendments) 2013 ke udah dikemedar Dewan Undangan Nengeri bedau lama tu tadi.
Bela datai kededua Menteri Muda Pengawa Berumah Datuk Francis Harden enggau Datuk Abdul Karim Hamzah, Chairman HDC Datuk Dr Abang Abdul Rauf enggau Chairman Daya Buliders Sdn Bhd Dr Abdul Rahman Junaidi.