JULAU: Salah, barang sapa peranak menua tu ke ukai peranak asal nukar status sida nyadi peranak asal menua ketegal deka meli tanah Adat Bansa Asal (NCR), ku Menteri Pemansang Tanah, Tan Sri Datuk Amar James Jemut Masing.
Ku iya, perintah amat ngemeratka pekara tu.
“Kitai ngembuan komiti kabinet menua ke matau tanah NCR kena nyeliahka pengawa bejual beli enda nitihka atur ,” ku iya.
Iya bejaku munyi tu ngagai pengarang berita sepenembu bejadika rumah panjai baru, Rumah Seli Nyambong ke panjai 16 pintu di Ulu Lioh diti, kena Hari Enam nyin tadi.
Iya disempulang Kaban Parlimen Julau, Datuk Joseph Salang.
Nengah awak nya, Masing mega lalu ngabas projek bekal ai enggau kuasa ba rumah panjai nya.
“Taja pia, enti sida jadi nengah chara ke betul enggau peranak bansa asal menua menua tu, nya nadai ngawa.
“Tang, enti sida nukar status semina ketegal deka ngulihka tanah NCR, nya salah sereta enda dikemendar.
“Aku arapka raban ke bekaul, baka ari Opis Tanah enggau Survei, Opis Pelilih Mit enggau Opis Residen nemu sentang pekara tu,” ku iya.
Masing mega madah, orang ti ngempu tanah NCR diatu diberi pilih ngemansangka tanah nya sereta tau minta bantu ari FELCRA Berhad.
Berebak enggau nya, Salang ke mega Chairman Kaunsil Penyanding Penemu 1Malaysia Sarawak madah, penyampau duit jalai kena ngaga rumah panjai di Sarawak patut ditikika.
Ku iya, duit jali RM10,000 ti dikemendarka ungkup sesebuah ruang bilik diatu enda umbas dikena.
Rega perengka kena berumah baka kayu enggau semin udah majak niki, ku iya.
“Tambah mega lebuh kita bulih nginjau, kita semina diberi perengka kena berumah ari konriktor ti dipaduka, ukai utai bukai ke manah agi ari nya,” ku iya.
Iya mega madah, enda mayuh peminta orang ke deka nginjau nya dikemendarka.
“Ungkup raban Dayak di menua pesisir, nya kelalu mar tambah mega lama baru sida nembuka rumah panjai ke digaga nya.
“Sida begunaka semua bantu ke bisi dikena ngelengkaska pengawa berumah nya,” ku Salang.
Iya mega mantaika langgur penemu ngambika Opis Tanah enggau Survei nyukat tiap iti lot ba rumah panjai ngambika sida bulih surat ngempu tanah nya.
Enti sida bisi surat ngenukuka sida ngempu tanah nya, sida ulih minta penyampau duit jali ke mayuh agi, ku iya.
Iya arap kabinet menua mantaika pekara nya ngambi dikemeratka perintah besai.
“Aku mega arapka Kaban Parlimen Dayak ari menua tu meri sukung enti pekara tu dibai ngagai Parlimen,” ku iya. — Bernama