DIKELALU NGENA TANDA SINGA: Raban pengabang dikelalu ngena tanda singa, bela bisi ayan, Yap (dua kanan) enggau Lau. Muak ke kanan Yap nya bini iya.
SIBU: Lebih ari 500 iku pengabang datai ngabang nyerumba Taun Baru China (TBC) ba Opis DAP Dudong enggau Lanang di Jalai Aman ditu kilah ensana.
Atur pengawa nya dirichah nengah atur mantaika tanda singa dilagu nengah seiku lelaki ke digari nyemaka petara bidik lansik.
ADUN Dudong Yap Hoi Liong madah, tu mih maya sida sama bekunsi pengaga enggau rayat di sitak sida.
Bela bisi datai ngulu atur pengawa nya MP Lanang Alice Lau enggau bala kaban parti ke bukai.
Berebak enggau nya, Opis DAP Dudong enggau Lanang mega bisi ngatur kimpin tanda jari pagi nya dikena ngumpul sukung minta rega karan enda ditiki bekaul enggau peniki ungkus pengidup.
Kededua Yap enggau Lau mega meri ‘ang pau’ ngagai bala nembiak.
Bala pengabang bela dikelalu merarau chara nyeput kediri.