SAUP KAMI: Rayat ke diau di Rumah Kus Murah Stutong Baru minta perintah masuk campur mutarka
penusah sida.
KUCHING: Rayat ke nguan Genturung Pendiau Rumah Kos Murah Stutong Baru minta perintah masuk campur ngambika tau mutar penanggul bekaul enggau rumah sida.
Pinta nya dikenatai urung 90 iku orang ke tebal agi ngembuan penatai pemisi mit lalu sida napi penusah nadai endur diau pengudah kunteriktor ngansak sida mayar ambis laluh rumah kos mit ke bedau dibayar sekali.
Nitihka penerang ari Nyuin Nunont, naka ke diatu iya udah mayar lebih RM13,000 nengah bayar pupuk tiap bulan ngagai kunteriktor ke alai diatu sida dipinta mayar laluh rega rumah sekali.
“Sebedau tu aku mayar kunteriktor nengah chara pupuk RM200 ninting bulan tang ba pengujung taun 2012, kunteriktor enda nerima bayar pupuk agi lalu minta kami mayar laluh rega rumah sekali.
“Dini kami ke kurang penatai pemisi tu ulih ngiga duit penyampau nya dikena mayar ambis laluh rega rumah nya,”ku iya.
Nyuin madah, iya kala minta lun ari sebengkah bank munyika dipinta luyar kunteriktor lalu lun nya udah dikemendar.
Tang, iya madah lun nya udah dikinsil bank lalu nambah penusah iya mayar rega rumah kus murah nya.
“Kami minta perintah kelebih agi opis menteri pengawa berumah masuk campur lalu nyaup mutarka penanggul kami,” ku iya lebuh dikerandau maya ngadu pengawa bantah ba mua opis kunteriktor ditu, kemari.
Ba kaul ke sama, Chairman Parti Tindakan Demokratik (DAP)Sarawak Chong Chieng Jen ke bela datai ngemata pengawa bantah nya madah iya udah ngerandau kunteriktor nengah luyar sida.
“Kami udah nulis surat ngagai opis menteri pengawa berumah sereta Yang Berhormat (YB) Abdul Karim ngambika tau netap maya berandauka pekara tu enggau rayat ke napi penusah kenyau ari bulan Julai taun ke udah tang lalu bedau nerima timbal,”ku iya.
Chong ke nyadi ADUN Kota Sentosa enggau MP Bandar Kuching madah tebal agi rayat ke napi penusah nya nadai ngembuan penatai pemisi ke meruan lalu enggau kebuah nya sida pedis teulihka lun ari bank.
“Nadai penetap nyebut sida enda ulih ngambi lun ari bank tang bisi atur ke disetuju entara sida ti ngemendar sida mayar RM200 sebulan nyentukka abis,” ku iya.
Chong madah kunteriktor nginsil sempekat lalu deka ngerampas rumah ari rayat.
“Diatu sida diasuh angkat ari rumah, dini sida deka diau? Atur tu tau nambah pemayuh orang berurah sengapa endur ke alai pekara tu patut diputar enggau manah.
“Kitai mega enda lantang ati enggau opis pengawa berumah ti enda bebendar mantu rayat,” ku iya.
Bela datai MP Stampin Julian Tan.