SRI AMAN: Ulah ke begempung ti dikemeran nengah sesebengkah program beripai ke diatur orang besai tuai patut diterenak ba raban nembiak, ku Pemesai Khas Kaban Parlimen Sri Aman, Edmund Pirang.
Ku iya, bala nembiak patut dibai enggau ba program ke baka nya ngambika ulah ke begempung nya ulih diterenak ba sida.
“Perintah ngalaluka gerempung enggau ejensi ngatur sebarang program di menua tu ngambika ulih ngaul bala nembiak sereta nerenakka ulah nya”,pia ku iya.
Iya bejaku munyi tu ngarika Kaban Parlimen Sri Aman, Masir Kujat lebuh bejadika Program Beripai enggau Program Jiwa Murni ke diatur Opis Pelilih Mit Pantu, ba opis nya pagi ensana.
Ku iya, nembiak rebak baru patut diiri enggau ulah begempung tauka beripai nya laban sida meh ke ngempu pemansang enggau pengelikun di Malaysia tu ila.
“ Kami enggai meda bala nembiak tu semina bisi malut orang tuai ba sesebengkah program aja, tang sida patut diperansang masuk ba program ke baka tu ngambi ulih sama bela begempung.
Sama bisi ngulu Hadir program nya, DO Sri Aman, Ismawie Salleh, Azmi Morshidi enggau Hendry Kran ari Opis DO Sri Aman enggau Pengulu Entika.
Urung 20 iku pengereja pengawa ari opis DO Sri Aman, opis pelilih mit Pantu enggau sekeda bala ketuai raban bansa di Pantu ngulu program ke berangkah pukul 8 pagi nya.