DIPUJI: Kamalanathan benung betabi enggau nembiak SK Green Road maya penemuai seraya bejalaika pengawa ditu, kemari.
KUCHING: Penyulut sesebengkah sekula ukai semina ba akademik aja tang mungkur semua pekara.
Sapit Menteri Pelajar II P. Kamalanathan madah pemujur ke silik ukai semina dalam pekara akademik tang nyengkaum ko-kurikulum.
“Perati aku penyerakup sereta kerejasama semua nembiak di sekula tu (SK Green Road) chukup manah.
“Ba pengawa ajat enggau Wushu tadai, aku beratika nembiak ke ngaga pengawa tu ari macham pupu bansa… Utai bansa tu pemerat ke deka terus dijaga Perintah,” ku iya madah lebuh bejaku ba atur pengawa nemuai ngagai sekula SK Green Road ditu, kemari.
Kelimpah ari nya, iya madah nyadi pengajar mega ukai tanggungpengawa ke muntang.
“Barang endur ke bisi alai ku nemuai, aku sigi seruran meri terima kasih ngagai pengajar laban udah bejalaika tanggungpengawa sida iya enggau manah sereta enda ngarapka upah.
“Ukai nyamai nyadi pengajar kemaya hari tu. Enti suba maya besekula, lebuh kena rutan pengajar ketegal bisi penyalah ke digaga, lebuh pulai ke rumah udah nya, ku jaku ka madah ngagai apai indai tang udah nya kena rutan apai indai.
“Kemaya hari tu enda sebaka, enti kena rutan ba sekula, nembiak madah ngagai apai indai lalu udah nya hari siti, apai indai datai lalu mai luyar. Aku sinu meda pegajar, ukai besai gaji sida dikena ngambi luyar,” ku iya.
Iya nandu baru, seiku-seiku nembiak ke tejapaika pemujur, nya tanggungpengawa pengajar udah mujur ngasuh nembiak iya mujur.
“Tang enti nembiak nya enda mujur dalam peresa, anang nyalahka pengajar. Nyadi pengajar ukai nyamai laban sida iya mayuh tenggaungpengawa. Nya alai, pengawa apai indai chukup berat beratika pengawa anak sida iya,” ku iya.
Kamalanathan muji sekula SK Green Road laban ngayanka kerejasama entara Gerempung Apai Indai enggau Pengajar.
“Ba ditu pemerat PIBG bekerejasama enggau sekula ngambika muntang Opis Menteri Pelajar (KPM) bejadika program inisiatif KPM,” ku iya lalu nambah, iya muji SK Green Road nya ke udah meri kelala Jaku Tamil diajar di sekula nya.
Sekula SK Green Road entara sekula ke pengabis nyulut di menua tu, lalu dalam timpuh entara 2009-2013 sekula nya mujur teulihka pemutus peresa UPSR 90 peratus pass penuh.
Bela bisi ngulu atur pengawa nya Sapit Direktor Opis Pelajar Sarawak Abdul Rahman, enggau Kepala Pengajar SK Green Road Awang Kassim Awang Husain.