NGEMERATKA PENEGAP PARTI: Mawan (duduk tengah) bejaku ngagai pemberita pengudah aum Kaunsil Tinggi SPDP kemari.
Pemutus tu bepun ari lalau Menteri Besai enggau Kepala Menteri ti ngemeratka penegap BN
KUCHING: Parti Progresif Demokratik Sarawak (SPDP) sedia bejalaika atur ti patut dikena ngenegapka parti sereta Barisan Nasional seraya nyaut lalau ari Menteri Besai enggau Kepala Menteri.
Presiden parti nya Tan Sri William Mawan madah, SPDP angkun ngenegap sereta ngempung BN Sarawak nitihka tangkan ari kededua ketuai ngambika majak tegap lebih agi dikena napi pengawa bepilih nengeri tu ila.
“Lalau ke dipansutka Menteri Besai enggau Kepala Menteri nya chukup beguna lalu patut dikemerat ke alai kitai nyadang pengawa bepilih nengeri deka diatur kandang timpuh setaun dua tu.
“Serakup parti dalam BN mega dilalau mutarka sebarang penanggul ke bisi ditapi. Ditu raban kaunsil parti meri mandat ngagai aku enggau sapit presiden berandauka enggau jauh senentang pesan ari kededua ketuai BN nya.
“Taja pan kitai bisi penanggul dalam parti, kitai mega angkun ngerampas penuduk ti udah dialah lalu atur ngenegap parti entara sebengkah chara ke pemadu manah endur kitai nyapai juluk,” ku iya.
Iya mansutka jaku tu ba sebengkah aum pengarang berita pengudah ngulu aum kaunsil tinggi parti nya ba indu opis SPDP di Jalai Badaruddin ditu, kemari.
Ngenang senentang jaku iya ti sedia nerima pulai raban G5 ngagai parti, Mawan madah naka ke diatu sida lima nadai ngenataika pinta masuk nyadi kaban parti baru.
“Kitai netapka pemutus ketegal deka meda parti majak tegap, semua patut sanggup berunding, ari nya baru pekara ulih diputar.
“Enti sida lima enda ngenataika pinta masuk nyadi kaban parti, nadai meh isu ke alai kitai pan enda meh ulih bejurai panjai agi,” ku iya.
Lima pengari rayat SPDP tauka G5 ke disebut iya nya ADUN Tasik Biru Datuk Peter Nansian, ADUN Bekenu Rosey Yunus, ADUN Batu Danau Paulus Gumbang, ADUN Marudi Datuk Sylvester Entrie enggau MP Mas Gading Datuk Tiki Lafe.
Nyaut tanya senentang berita ti nyebut SPDP enggau SUPP ti deka begempung, Mawan madah parti seruran tebuka ba sebarang perambu enggau inisiatif ti tau ngeringka BN.
Taja pia, iya madah, kitai enda ulih begempung enti sepiak aja ke keran, ba piak SPDP, kitai ngelaluka perambu nya.
Bela datai ngulu aum nya, Sapit presiden Datuk Seri Tiong King Sing, Sekretari Besai Nelsong Balang Rining enggau kaban bukai.