KUCHING: Jabatan Hal Ehwal Veteran (JHEV) Raban Soldadu Malaysia (ATM) deka muka kaunter mindah kin kitu di Dewan Masyarakat Lundu kena 9 Mac tu ila.
Tuju iya dikena ngemuntangka orang ti kala nyadi soldadu tauka balu di kandang menua nya enggau ke semak nyengkaum Kuching enggau Bau senang ngatur pengawa enggau opis nya (JHEV).
Kaunter nya dibuka berengkah ari pukul 10 pagi ngagai 4 lemai, ti meri peluang lebih agi ngagai orang ti kala nyadi soldadu enggau balu ti bisi penanggul ke deka bulih penerang ari pegawai ti bejalaika pengawa.
Orang ti kala nyadi soldadu tauka balu ke bisi pekara deka diatur enggau opis nya patut mai bup rikut servis, kad pengelala veteran enggau bini, surat pengada anak, surat tikah, surat pemati, pingat enggau midul sereta gambar.
Orang mayuh ti deka nemu silik pasal pekara nya tau betanya ngagai JHEV pampang Sarawak ba lumur 082-230357 tauka 082-230358.