ANANG RAWAN MANTAI PENEMU: Jeniri (kiba) mantaika penemu iya ba forum ‘The Relevancy of SUPP ‘ ke diatur Padungan Youth Movement ditu, kemari seraya dipendingka Lily.
Enti enda penyukung sida majak mayuh nguingka sukung ngagai penyakal: Jeniri
KUCHING: Raban ketuai dalam Parti Sa’ati Rayat Sarawak (SUPP) patut berani enggau chakah ngenataika isu rayat ngagai perintah enti sida deka mulaika sukung ari rayat.
‘Senior lecturer’ ari Fakulti Sains Sosial Universiti Malaysia Sarawak (UNIMAS) Dr Jeniri Amir madah pekara nya nyadika kebuah SUPP majak enda nerima sukung rayat baka ke dipandang ba pemutus pengawa bepilih nengeri 2011.
Ku iya, parti DAP ulih ngerampas penuduk SUPP ketegal pengari ari parti penyakal nya berani mai pinta enggau peneka rayat ngagai renggat ke patut ngambika diperunding.
“Ketuai ari DAP seruran sereta berani mai isu rayat ngagai perintah. Sida bejaku ngarika rayat.
“Ketegal nya, rayat pechaya agi ke DAP lalu meri sukung ngagai parti nya maya pengawa bepilih. Rayat lebih agi bansa china ngalih lalu nyukung DAP,” ku iya.
Iya mansutka jaku tu ba sebengkah forum ‘The Relevancy of SUPP ‘ ke diatur Padungan Youth Movement ditu, kemari.
Iya ke mega seiku pengemata politik di Sarawak nambah, SUPP deka majak alah lalu deka lenyau mayuh agi penuduk baik nya ba sitak kunsil nengeri tauka parlimen enti ketuai sida enda ngemeratka pekara nya.
“SUPP mengkang ulih nyadi parti ke dikerinduka rayat enti pekara tu dikemerat lalu dipejalai enggau silik.
“Enti nuan (ketuai SUPP) patut bejaku mantaika isu rayat, bejaku meh enggau nadai asai rawan ungkup pemaik rayat ke nyadi penyukung,” ku iya.
Anang irauka penuduk enggau pangku pengawa diri, tandu iya.
Berindik ari nya, enti SUPP deka angkat tegap, Jeniri madah sida patut beratika baru semua pekara ke udah nyadi ti ngujungka parti nya enda nerima sukung ari bansa china agi.
Ku iya, pekara ke nyadi dalam timpuh lima taun ke udah patut nyadika teladan enggau tenggau.
“Kededua piak ke belaya patut ngelengka laya lalu duduk berundingka pejalai parti. Raban ketuai sida patut mutarka laya lalu bebaik.
“Enti sida enda berubah, rayat deka ngubah sida ke alai kitai enda tekenyit enti SUPP majak alah ba pengawa bepilih ke deka datai,” tandu Jeniri.