PEMANSANG BISI BA PENGARI BN: Adenan ngenukuka, enti peranak dia nyukung pengari BN, sida deka teulihka pemansang.
MUKAH: Chairman Barisan Nasional (BN) Nengeri Tan Sri Adenan Satem besemaya deka bebendar mantu sereta nyadi tulang belakang pengari BN ba pengawa bepilih mit (PRK) DUN Balingian, Yussibnosh Balo.
“Aku deka mantu. Sebarang maya iya begunaka agih belanja, aku deka meri ketegal kitai ngarika parti ke sama lalu aku besemaya, iya deka teulihka sukung aku. Lalu enti chalun ari penyakal minta agih belanja taja pan iya menang, aku enda meri sesen pan. Tu ukai jaku sumbung tang nyadi pekara ke amat,” ku Adenan ke mega presiden Parti Pesaka Bumiputera Bersatu (PBB).
Adenan nambah, bida entara Balo enggau chalun PKR, Abdul Jalil Bujang iya nya Jalil nadai nerima sukung ari perintah lalu enda sekali deka nerima projek pemansang ketegal nadai seiku nyukung iya.
“Bida ti kedua iya nya, PKR semina ‘tin puang’ ke nemu rerauh sengapa tang enda kala ngamatka jaku,” ku Kepala Menteri (KM) ba sebengkah pengawa ketuai begulai enggau rayat ke diatur di Balai Raban Bansa Abdul Rahman Yakub di Kpg Tellian Laut, Mukah.
Adenan ke nganti penuduk Pehin Sri Abdul Taib Mahmud nyadi Kepala Menteri kenyau 28 Februari tu tadi madah, Taib minta iya nampung pesan tu ngagai rayat ditu.
“Sebedau iya ngelengkaka pangku pengawa, Taib ngelalau aku ngambika seruran ngingatka rayat senentang pengawa ti udah dikereja iya ngagai rayat di Balingian sereta ngingat pemeri ti udah disedia ngagai semua peranak di serata Sarawak.
“Berindik ari nya, enti kitai amat muji pengawa iya ti manah, Taib minta kitai semua ngundi chalun PBB/BN ke mega parti iya. Tang enti kita enda ngingatka pesan ari iya, reti nya kitai deka tulah ketegal iya udah mayuh meri pemaik ngagai kitai semua,” ku Adenan.
Dulu ari nya, seiku pengari PBB pampang Kpg Tellian Laut, Kpg Datuk enggau Kpg Penakub Permai, Long Bedul madah penyampau orang ngundi ari ketetiga genturung pendiau nya manggai 1,695 iku lalu semua sida nyukung chalun BN.
“Peranak ari ketetiga genturung pendiau tu udah nyukung BN kenyau ari taun 60 menya. Kitai deka nyukung chalun BN enda ngira batang pengarap iya ketegal kitai ngakun diri ngarika ssebengkah komuniti,” ku Long.
Besemaya deka nyapai majoriti ke besai agi, iya deka nentuka nadai undi deka pulai ngagai penyakal.
“Nadai jaku ngalih agi. Kitai deka nentuka BN menang nengah majoriti besai,” ku Long.
Iya madah sebedau pengawa kimpin berengkah, raban ari penyakal udah dulu alah bulu ketegal ketuai PKR nengeri Baru Bian ngakun pedis deka nyatup BN.