Rayat Lundu ngining segang pemansang di Samarahan, Mukah

0

LUNDU: Besai pengarap rayat di pelilih Lundu deka meda kandang menua nya dikemansang baka ke udah dipeda nyadi di Samarahan enggau Mukah.

Sapit Menteri Dalam Menua Datuk Dr. Wan Junaidi Tuanku Jaafar madah iya chukup pechaya dia Kepala Menteri ke baru ke mega Kaban Kunsil Nengeri Tanjung Datu Tan Sri Datuk Amar Adenan Satem deka beratika pekara tu enggau berat.

“Pelilih Samarahan enggau Mukah ke dulu suba semina nyadi kandang menua ke diuwan orang bumai enggau berikan.

“Ketegal kededua penuduk nya kala diarika kepala menteri ke dulu suba (Pehin Sri Abdul Taib), diatu Samarahan enggau Mukah udah diubah nyadi siti mengeri besai.

“Aku pechaya Adenan pan ulih ngubah pelilih Lundu nyadi siti mengeri manah ke ngembuan chukup perengka guna,” ku iya.

Wan Junaidi mansutka jaku tu ba pengerami Ketuai Begulai enggau Rayat ke ngundàng Adenan nyadi temuai pemadu dipebasà ke diatur di Balai Guna Mensia Mayuh Lundu, kemari.

Pengerami mega nyadika sebengkah atur besukurka pemujur Adenan diangkat nyadi Kepala Menteri Sarawak ke 5.

Wan Junaidi ke mega kaban parlimen Santubong madah peranak Lundu patut ngasai pengelebih diarika kepala menteri ke mega nguasa ADUN Tanjung Datu sereta peranak asal Lundu.

“Kitai nyadang, dalam timpuh 4 ngagai 5 taun ti deka datai, Lundu deka ngasaika pemansang,” ku iya.

Nimbal jaku Wan Junaidi. Adenan madah sigi deka mai pemansang ba pelilih Lundu ke alai nyendiakka pekara penyambung ngagai Tanjung Datu nyadi sebengkah pekara ke dikemerat diatu.