Tuesday, November 24

Sebuah agi Kolej Komuniti deka ditumbuh di Lundu, ku Wan Junaidi

0

KUCHING: Sebuah agi pampang Kolej Komuniti diperambu ditumbuh di pelilih Lundu manggai ba taun 2015, ku  Sapit Menteri Dalam Menua Datuk Dr. Wan Junaidi Tuanku Jaafar.

Iya ke mega Kaban Parlimen Santubong madah pekara nya sebengkah ari pengawa nyendiakka palan pelajar enggau perengka guna rama bukai ungkup peranak menua di Lundu.

“Kitai ngasai palan pematih enggau perengka guna bukai patut disedia di pelilih Lundu pengudah Kepala Menteri ke baru ngarika penuduk Dewan Undangan Negeri (DUN) Tanjung Datu.

“Ketegal Tan Sri Adenan ngarika DUN Tanjung Datu ke alai iya mega peranak asal Lundu, rayat ngarap menua nya ulih dikemansang baka ke udah dipeda nyadi di Samarahan enggau Mukah.

“Kepala Menteri ke dulu, Pehin Sri Abdul Taib udah mujur ngubah pelilih Samarahan enggau Mukah nyadi sebengkah mengeri besai ketegal iya kala nguasa kededua pelilih nya,” ku iya.

Wan Junaidi mansutka penerang ngagai pemberita pengudah bejadika pengawa nutup ‘Fiesta Kolej Komuniti Santubong Begulai enggau Komuniti 2014’ di Demak Laut, kemari.

Iya mega ngasai nadai kebuah Lundu enda ulih dikemansang setikas Samarahan enggau Mukah.

“Aku pechaya Adenan deka nyukung perambu numbuhka pampang kolej komuniti di Lundu. Kepala Menteri mega andal meda mayuh projek pemansang dipejalai nyengkaum numbuhka institusyen bukai,”ku iya.

Perintah Sarawak nadai penanggul nyendiakka tanah endur numbuhka kolej tu ke alai aku mega nadai penanggul berandau enggau pemesai ari opis menteri pelajar minta pemendar pampang kolej komuniti ditumbuh di Lundu, tandu iya.

Ba pengerami nya, Wan Junaidi nyuaka setipikit ngagai 200 iku penyereta ti mujur nembu 8 kus timpuh pandak ba Kolej Komuniti Santubong.

Bela datai ADUN Demak Laut Dr Hazland Abang Hipni, Kepala Polis Kuching Roslan Bek, Direktor Kolej Komuniti Santubong Baki Nyogen enggau orang bukai.