SIBU: Pedaja ba Pasar Tamu Sungai Merah ditu berasai lantang seput sereta tuchum enggau makit ti disediaka Majlis Perbandaran Sibu (MPS) ke sida empai lama ti udah.
Seiku pedaja Tipas Ngalang, 50an, madah pengawa nyendia kanopi ke besai sereta disikap enggau lampu sereta mija ungkup tiap iku pedaja, ngelantangka seput sereta endang lama udah dianti sida.
“Diatu kami lantang agi bejalaika pengawa dagang sepengudah MPS nyemin baru kandang endur urung seminggu ke udah,” pia ku iya madah ngagai The Borneo Post lebuh ke enggau betemu ba makit nya kena Hari Empat tu tadi.
Ku iya, urung 40 iku pedaja di makit nya tebal agi datai ari sekeda rumah panjai di Pasai enggau kandang menua Teku.
Sebedau tu, sida nadai chara bukai kelimpah ari bedaja ba palan ke enda menuku, nadai langkau enggau mija, baik nya maya panas enggau ujan.
Seiku agi pedaja ke nama iya enggai ditulis ditu, arapka MPS nyendiaka kipas enggau ai paip ba makit nya, ku iya.
Iya mega madah, ketegal hari ke angat buah enggau sayur ke dijual sida layu sereta lalu.
“Kami berasai gaga ati bejual ditu.
“Kami arapka MPS majak nulung kami,” pia ku iya seraya madahka sida semina nyuwa makit nya RM1 sehari.
Barang ke bisi dijual ba makit nya baka asil ari kampung, sayur, buah, ikan manuk idup enggau pemakai ke udah dipanggang.
Tebal agi bala pedaja tu bejual nadai pemendar ba sepemanjai jalai di Sungai Merah.
Ketegal nya, MPS lalu ngelumuka sida ngambika bejual ba sebuah palan baru dalam taun 2010.