KUCHING: Hari Taska ke nyadi tanda meri basa ungkup pemanah sereta pemeri raban pengibun nembiak mit deka diintu di Kuching kenaka 21 Jun 2014.
Menteri Pengintu Pengelantang Pendiau, Orang Indu enggau Pemansang Ruang Bilik Datuk Fatimah Abdullah madah perintah netapka pemutus nya ketegal tanggung pengawa ke dipejalai raban nya diatu dipeda chukup berat.
“Raban pengibun nembiak ngembuan tanggung pengawa ke chukup besai nyemaka pangku pengawa ke dipejalai pengajar di tadika.
“Ketegal nya, Hari Taska deka diintu kenaka 21 Jun 2014 ke nyadi pengawa meri basa ngagai pengawa manah sida ti nyendia pelajar tumu ngagai bala nembiak mit,”ku iya.
Fatimah mansutka jaku tu ba pengawa Nutup Kus (Pandak) Asuhan Permata ke diatur LH Educational Resources di sebuah hotel ditu, kemari.
Iya nambah, raban pengibun tauka taska tu nerima nembiak mit ke beumur 3 bulan nyentuk 4 taun ke alai nembiak mit deka diintu manah, diberi pelajar pemun sebedau ngalih masuk tadika maya umur manggai 5 tauka 6 taun.
“Taska udah nyadi sistem sukung ngagai raban apai indai ti bela gawa nganjung anak sida ngagai siti palan ti diintu manah, tandu Fatimah.
Kelimpah ari nya, nitihka Akta Taska 2012, tiap orang bempu taska, menijer, pematau enggau pengibun patut datai Kus Asuhan Permata (KAP).
“Diatu, raban pengasuh sigi udah chukup dilatih lalu nembiak ke dianjung ba taska deka diintu sereta diberi pelajar ke pemadu manah,”ku iya.
Nitihka statistik taska di Nengeri Sarawak ke dipansut Opis Menteri Pengintu Pengelantang (JKM) naka ke bulan April 2014, sepenyampau 652 iku pengibun benung ngajar urung 3,299 iku nembiak di mayuh taska serata nengeri.
Bela datai Direktor LH – Educational Resouces Irene tan sereta orang bukai.