MARUDI : Ex- Tuai Rumah panjai Padang Kerbau B di Poyut/Lubok Nibong ke diripot lenyau dalam pejalai ke kebun lada ti ngenyauh lima minit pejalai ari rumah panjai sida kena Hari Dua minggu nyin tadi, udah ditemu parai ba kandang rumah panjai nya.
Raban Penginga enggau Penyelamat nemu bangkai iya urung pukul 1.15 ngalih hari kena Hari minggu udah bekau ke begigaka iya dalam kandang tiga malam empat hari.
Ex- Tuai Rumah Alfonso Deli Sigah, 69, dipechaya nitihka bini iya , Bejau Rimong, 58, enggau anak indu tuai iya , Seniah Deli ke kebun lada sehari nya, ke alai iya lalu ditemu lelang.
Ku Seniah lebuh ti dikerandau pemberita The Borneo Post , niang api iya enda bepengerai tegal kala ngidap penyakit strok beberapa taun ke udah.
Taja pia iya ulih bejalai ngena tungkat.
Ku iya baru, sebedau bangkai apai iya ditemu, sida nguji ngiga iya ngena mayuh macham chara nyengkaum bemanang sereta begawai ti ngujungka bangkai apai iya lalu ditemu.
Pengelebang iya ngenakutka komuniti Iban ba kandang menua nya, laban nya meh kedua kali orang udah lelang ke alai sebedau tu bisi seiku orang tuai ari Rumah Entika Maoh, Sg Poyut ke benama Kanang Empikau, mengkang lebang nyentuk ke diatu lebuh ngetan bubu ba sungai.
Nengah awak tu, Seniah ngarika sida sebilik beterima kasih ngagai semua orang ti udah mantu begigaka apai iya baka raban Polis, Bomba enggau bala ari rumah panjai Lugan Tungga, Lobang Kompeni, Sg Poyut, rumah panjai Rumah Baran enggau Padang Kerbau A sereta bala kaban belayan bukai, ku iya.