DEKA DIKEMANSANG: Palan Brooke Dockyard ti sdalam perambu nyadi Palan Pesaka Lama (Herritage site).
Pengawa ngemanah tempat nya ngambika waterfront Kuching ditangkir, ku Abang Johari
KUCHING: Kandang menua Tebing Sg Sarawak ngelingi mengeri Kuching, nyengkaum jeti Sg Bedil nuju jeti Tanjung di Petra Jaya,sereta palan Brooke Dockyard deka diubah nyadi palan pematak temuai.
Menteri Dagang Temuai Datuk Amar Abang Johari Tun Abang Openg madah pengawa ngemanah kandang nya deka nentuka waterfront Kuching dikerembai panjai agi.
“Perintah deka ngemanah tebing Sg Sarawak bepun ari jeti Sg Bedil (Astana) nuju jeti Tanjung nyemaka pengawa ti udah diadu kitai di Kpg Masjid enggau Kpg Bintangor.
“Kitai mega deka ngenanka pendiau asal begunan Brooke Dockyard nyengkaum penyikap ke disedia lalu ngangkatka palan nya nyadi Muzium Maritime.
“Pengudah nya, kitai deka netapka semua kandang endur ke besemak enggau waterfront kelebih agi begunan lama nyadi Palan Pesaka Lama (Herritage site),”ku iya.
Iya mansutka jaku tu ngagai pemberita pengudah nemuai matau projek ngenan tebing sungai besemak enggau Kampung Bintangor, Satok ditu, kemari.
Abang Johari ke mega Menteri Pengawa Berumah madah projek ngemanah kandang endur nebing Sg Sarawak nya entara sebengkah projek ke udah ditusun ba Atur Pemansang Malaysia Lumpar ke 11 (RMK11).
Ba kaul ke sama, iya madahka Sarawak RiverBoard (SRB) deka bejalaika pengawa ngemanah jeti di Kampung Paroh enggau Batu Kawah (Lama).
“Kededua palan tu ngembuan sejarah diri lalu kitai deka bejalaka atur ti patut nyengkaum ngemanah jeti dikena matak mayuh agi temuai datai,”ku iya.
Abang Johari netapka projek pemansang ke benung dipejalai ba tiap palan nebing Sg. Sarawak ulih ngangkatka dagang pengangkut ai di mengeri Kuching.
Ngenang senentang projek ngenanka tanah nebing Sg Sarawak besemak enggau Kpg Bintangor, iya madahka projek nya deka tembu ba bulan September taun tu.
Ku iya, projek nya nyauka tembu lalu semina nganti pengawa ngaga teruwung ai nuju ke Kpg Bintangor tembu.
Bela datai Sekretari Politik ngagai Kepala Menteri ke mega ADUN Samariang Sharifah Hasidah, Direktor SRB William Jinep, Direktor DBKU Dr Saadiah Abdul Samat enggau orang bukai.