KUCHING: Program ‘Klinik Pusaka Bergerak’ deka ditumbuh tauka diberikelala di serata nengeri Sarawak ngambika rayat meretika pemesai guna Pengurusan Perwarisan, ku Chairman Amanah Raya Berhad, Datuk Sri Reezal Merican Naina Merican.
Iya madah, program nya sebengkah inisiatif AmanahRaya betemu enggau rayat di nengeri tu sereta nerangka pekara bekaul enggau Pengurusan Perwarisan, ti deka dipejalaika enda lama agi.
Naka ke diatu pampang opis tu semina bisi di Kuching, tang Sarawak tu kelalu besai lalu udah tentu begunaka mayuh agi AmanahRaya, ku iya.
“Nya alai, keterubah iya kami deka bejalaika program ‘Klinik Pusaka Bergerak’ sebengkah program betemu enggau ‘pelanggan’, ke diatu agi dikerandau lalu deka dipejalaika bererenggat di serata mengeri ti ukai semina ba Kuching tang nyerangkung Sibu, Bintulu sereta kandang menua pesisir.
“’Pengurusan pusaka’ tu amat beguna sereta sebengkah ari produk, nya alai kami deka chakah meri penerang ngagai rayat pemanah ngatur pesaka ba AmanahRaya.
“Mayuh orang ti nadai ti enda ngatur manah reta pesaka, pengujung bisi bechiping lalu ti kena pangka ari penanggul nya tebal agi raban orang indu,” ku iya.
Reezal mansutka pekara nya dalam aum pengarang berita pengudah pengerami bejadika opis baru AmanahRaya Pampang Sarawak, di Jalan Kulas ditu, pagi kemari.
Opis baru nya dipenyadika Menteri ba Opis Menteri Besai Nancy Shukry.
Dalam aum pengarang berita, Reezal arap bendar dalam timpuh setaun AmanahRaya udah dikerembaika di serata nengeri ti bekaul enggau servis sereta mutarka penanggul bekaul enggau ngatur pesaka.
Nambahka nya iya madahka AmanahRaya deka nempa kerejasama enggau mayuh ejensi sereta instituti kewangan ti ulih mantu ngerembaika produk enggau servis AmanahRaya ngagai raban bansa.
“Kami dalam perambu ngatur sempekat pemereti ati (MoU) enggau organisasi ti senipak ngerembaika produk enggau servis AmanahRaya, ambika banding enggau sida bank sereta, laban bank ngembuan pampang ti mayuh nyengkaum ba pelilih menua mit.
“Nengah ejensi nya orang mayuh enda ibuh datai ngagai opis kami di Kuching,” ku iya seraya madahka AmanahRaya mega melaba deka nempa kerejasama enggau Pos Malaysia.
Ngenang sejarah Reezal madahka, Amanah Raya Berhad Pampang Sarawak sebedau tu ngena nama Jabatan Pemegang Amanah Raya ti ditumbuhka 1 Mac 1966. Pengudah dikorporat taun 1995, Amanah Raya Pampang Sarawak pindah ngagai Wisama Seberkas ti bejalaika pengawa ba endur nya urung sepuluh taun sebedau pindah ngagai Bangunan Kueh Hock Kui 1 April 2005.
“Ketegal ti deka meri pengelantang ngagai rayat, piak pengatur AmanahRaya ngemutus pindah ngagai palan baru dikena ngangkatka agi peluang dagang. Diatu kami pindah ngagai palan baru ti lebih kondusif sereta perengka pengakut ti lebih manah,” ku iya dalam jaku pengelalu madahka ba opis nya naka ke diatu semina bisi liam iku pengereja pengawa.
Bisi ngulu pengerami nya kemari Ketuai AmanahRaya Pampang Sarawak Saftuyah Adenan, Menteri Muda Pemansang Pengawa Berumah Datuk Abdul Karim Rahman Hamzah, Kaban Kunsil Nengeri (ADUN) Lingga Simoi Peri enggau ke bukai.