Anang semina landik ngelobi projek, ku Nancy

0

Konteriktor mega patut bebendar ngereja pengawa ngambika atur pemansang nya nguntung ke rayat

KUCHING: Raban konteriktor ke dipilih bejalaika projek perintah enda patut semina landik ngelobi projek tang deka bebendar ngereja pengawa ke penguntung rayat.

Menteri ba Opis Menteri Besai, Nancy Shukri madah, dikena nyeliahka perintah dituduh rayat nadai meri sereta enda mujur bejalaika atur pemansang.

Tang ku iya, piak konteriktor ke dipilih nya patut bekerejasama enggau perintah nembuka projek enggau manah, ngambika nadai projek betangguh sereta enda ngunusah rayat.

“Anang semina deka minta ngelobi projek aja enti enda bebendar bejalaika projek nya, sinu ke mensia mayuh ke deka ngasaika penguntung ari projek nya.

“Aku ngarapka sesapa ke diberi tauka diasuh bejalaika projek perintah patut ngereja enggau manah sereta bebendar ngambika rayat enda nyalah perintah semina nemu meri projek tang enda mujur.

“Laban perintah endang udah meri ungkup belanja dikena bejalaika projek nya, ti meri penguntung ngagai rayat,” ku iya.

Nancy mansutka pekara nya lebuh dikerandau raban pemberita ba sebengkah aum pengarang berita ditu kemari.

Berindik ari nya, lebuh ditanya bekaul enggau penanggul ai ke nuntung peranak di Sadong Jaya, iya madah, diatu semina dua buah genturung pendiau ke betapi enggau nadai bekal ai beresi.

Ku iya, nya bepenanggul beduduk ari batang paip ti udah kelalu lama sereta udah jai, ke diperambu deka diganti tauka digaga ba taun 2005 lalu bedau tembu beduduk ari ti suah betangguh laban konteriktor ke dipilih bisi penanggul.

Iya madah, pemayuh tubuh mensia sereta ruang bilik ti udah nambah di kandang menua Batang Sadong bepun ari pemayuh kebun kelapa sawit mega ketegal peranak betapi penanggul ai.

Diatu kami udah ngaga baru lalu tangki ai benung digaga dikena mutar penanggul nadai ai, ku iya.

“Kandang endur ke endang nadai bekal ai beresi iya nya Genturung Pendiau Ensengei Iban enggau Kampung Ensengei Melayu. Taja pan batang paip udah datai ba genturung pendiau nya tang ai bedau laban tangki bedau tembu.

“Sebedau tu tangki nya udah digaga tang ketegal bisi penanggul (konteriktor) nya berengkah ari pun baru, nya kebuah lalu bedau tembu.

“Perintah ngemutuska ngaga tangki nya ngambika peneras ai lebih laju enggau manah,” ku iya melaba penembu projek nya ulih mungkur guna lebih 50,000 iku mensia.

Bejaku baru Nancy madah, perintah mega minta bantu gerempung korporat mutarka penanggul nadai ai di Genturung Pendiau Ensengei Iban enggau Kampung Ensengei Melayu.

“Nyema ke bisi kandang endur ke besai entara dua buah genturung pendiau nya kitai deka numbak tanah, nya sebengkah chara dikena mutarka jampat penanggul ai di Sadong Jaya lebih agi Genturung Pendiau Ensengei Iban enggau Kampung Ensengei Melayu,” ku iya.

Kelimpah ari nya Nancy madah, projek bekal ai beresi menua pesisir (BALB) ari Tembirat ke Asajaya enggau Sadong Jaya renggat kedua diatu udah manggai 70 peratus tembu.

“Projek nya dipelaba ulih tembu ujung taun tu,” ku iya seraya madah, perintah udah meri 26 tangki penapis ai Life Saver ngagai Sadong Jaya dikena betapi penanggul suntuk ai maya musim kemarau.