PVTMS sinu meda palan endur numbakka niang Bujang Berani nya enda dikeibuhka
PADAWAN: Lebih setaun pemidang Datuk Temenggung Kanang anak Langkau, kubur niang di Pendam Bujang Berani, Jalai Budaya Kuching mengkang baka pendiau asal lalu enda ngipakka gelar Bujang Berani ti diulih iya.
Bela rawan enggau gaya pendiau kubur penerima midul Seri Pahlawan Gagah Perkasa (SP) enggau Pingat Gagah Berani (PGB) nya, Serakup Soldadu Veteran Malaysia pampang Sarawak (PVTMS) minta perintah sereta ejensi ke bekaul beratika pekara nya enggau berat.
Nitih penerang Presiden PVTMS, Thomas Ling Kui Eng, serakup tu deka nulis surat ngagai Opis Menteri Besai sereta Opis Kepala Menteri minta pendiau Pendam Bujang Berani dikemanah nitihka pematut setikas enggau Tugu Negara di Kuala Lumpur.
“PVTMS ngemerat pendiau Pendam Bujang Berani di Jalai Budaya Kuching lebih agi kubur niang Kanang.
“Pengudah macha ba The Borneo Post ke alai kubur niang Kanang mengkang baka ke suba pengudah lebih setaun iya dikubur, sehari nya (8 April) aku lalu ngelawa kubur nya sereta ngambi sekeda gambar.
“Rawan sereta sinu, nya meh asai ati pengudah meda kubur Bujang Berani kitai menua ti enda dikeibuh. Nama pemati enda ditulis ba kubur nya, aku pechaya indah kubur orang ti nadai benama di menua pesisir manah agi ari nya,” ku iya.
Thomas mansutka jaku tu lebuh dikerandau Utusan Borneo pengudah bejadika PVTMS Biro RPR Landeh, Padawan ditu kemari.
Thomas nambah, PVTMS deka minta enda kurang ari RM300,000 ke alai belanja nya deka dikena ngangkatka pemanah kubur niang Kanang sereta ngaga Tugu Bujang Berani kelimpah ngemanah kandang endur ngelingi.
Iya ngasai perintah besai patut megai tanggungpengawa ngintu Pendam Bujang Berani ketegal semua orang ke dikubur ba pendam nya udah sanggup berambunka nyawa ngintu pemaik menua Malaysia.
“Belanja RM300,000 dipinta ngambika chukup dikena ngintu Pendam Bujang Berani sereta ngaga Tugu Bujang Berani. Enti belanja ari perintah besai enda chukup aku melaba perintah nengeri ulih nyaup nambah.
“Tugu Negara di Kuala Lumpur digaga nengah belanja RM1.3 juta lalu aku pechaya belanja ke dipinta ungkup Pendam Bujang Berani ulih diberi,” ku iya.
Kelimpah ari kubur niang Kanang, Thomas mega enda lantang ati enggau gaya pendiau kubur niang ASP Micheal Padil ke midang di Semporna Sabah ngelaban keruga munsuh penyelawai Suluk.
Iya madah deka ngenataika pekara nya ngagai Menteri Dalam Menua Dato Seri Dr. Ahmad Zahid Hamidi ngambika diperunding.
Bujang Berani Menua ke tebilang, Kanang, 68, midang kenaka 3 Januari 2013 urung pukul 1:45 pagi pengudah luput di rumah iya.
Kanang seiku peranak Sarawak ti dikemegah serata menua ketegal pemerani ngelaban keruga munsuh kominis maya ke agi meri servis ba Soldadu Darat Malaysia (ATM) ari taun 1962 nyentuk 1983.