KUCHING: Serakup Soldadu Veteran Malaysia Nengeri Sarawak (PVTMS) deka ngenataika perambu ngagai Opis Kaunsil Kandang Menua (PBT) ngambika nyiri mayuh agi veteran soldadu ke bepeneleba nyadi ketuai raban bansa.
Presiden PVTMS Thomas Ling Kui Eng madah perambu nya deka nentuka pengelandik enggau penau sekeda raban veteran soldadu ulih dipekunsi enggau komuniti kelimpah ari ti ngenanka sida ba servis perintah.
“Aku deka ngenataika perambu tu ngagai Datuk Seri Wong Soon Koh ke nguasa PBT. PVTMS merambu raban veteran soldadu ke bepeneleba dichiri mangku pengawa ba opis perintah baka nyadi kaunsilor, ketuai pupu bansa nyengkaum nyadi kaban direktor ba ejensi perintah,” ku iya.
Thomas mansutka jaku tu ba pengerami bejadika PVTMS Biro RPR landeh, Kota Padawan ditu kemari.
Iya nambah, bedau lama tu tadi serakup tu udah mujur ngangkatka seiku veteran soldadu di pelilih Sibu mangku pengawa nyadi kaunsilor ke alai pengawa ngangkatka sekeda ke bukai benung diperunding.
Berindik ari nya, ungkup pemaik enggau pemansang PVTMS, Thomas ngansak mayuh agi veteran soldadu ngerijista nyadi kaban dalam serakup.
“Mayuh agi tubuh kitai dalam serakup, kering agi nyawa kitai didinga raban ketuai, menteri enggau perintah.
“Kitai pechaya pemayuh tubuh deka nentuka pengering enggau penegap serakup,” ku iya.
Ba pengawa nya kemari, Thomas bisi nerima lebih 70 pom masuk nyadi kaban serakup PVTMS ari Biro RPR Landeh ke disua ketuai Biro Terin anak Gasing.
Awak begulai enggau kaban PVTMS Biro RPR Landeh kemari mega dikena Thomas nerangka sekeda tuju sereta pengawa ke udah dikereja serakup ngelamatu.
Ku Thomas, PVTMS angkun nentuka pemaik enggau pengelantang pendiau veteran soldadu diintu manah ke alai kerejasama begulai enggau serakup bukai ke bekaul lebih agi JHEV deka dikemerat.
Ba pengerami nya mega, Thomas bisi nyuaka bantu ngagai dua iku veteran soldadu ti enda dapat bejalai iya nya kaunsilor Jambu anak Ganing enggau Kasim anak Rabong.
Bela datai, sapit Ketuai PVTMS Pelilih Kuching Nelson Hanif Abdullah.