Raban CAC champian ba pekit ‘Muzik Kreatif Traditional’ 2014

0

PADAWAN: Raban ‘Creative Art Cultural’ (CAC) teulihka gelar champian ba pekit Muzik Kreatif Traditional 2014 ke diatur Opis Kaunsil Kandang Padawan (MPP) di Eastern Mall Padawan kemari.

Enggau pemutus nya, CAC nerima perais mata duit RM1,500, trofi, hamper sereta setipikit.

Empat tim ngambi bagi pekit ti keterubah iya diatur lalu penuduk lumur dua pulai ngagai raban HyBrid ti nerima perais RM800, trofi, hamper sereta setipikit.

Raban Matthill Warrior ba penuduk lumur tiga lalu mai pulai RM500, trofi, hamper sereta setipikit ke alai penuduk lumur empat pulai ngagai Bung Bratak Cultural Group.

Semua perais disuaka Chàirman MPP Ir. Lo Khere Chiang lalu bela dikemata chairman pemansang komuniti MPP kaunsilor Edward Kurik.

Dulu ari nya, ba jaku bejadi pengawa nutup pekit, Lo ngenataika pengaga ati meda pengeran nembiak rebak baru ngerembai main asal pupu bansa kelebih agi ba main tabuh.

“Aku gaga meda nembiak rebak baru ngembuan kreativiti ngerembaika main asal kitai bansa.

“Pengawa tu mandangka sida angkun nentuka main asal baka ke tabuh dipandang ngagai mensia mayuh,” ku iya.

Ba pekit nya mega, raban Bung Bratak Cultural Group nerima gelar kategori traditional pemadu manah lalu raban Creative Art Culture menang kategori kreatif.

Bela datai chairman pengatur pekit kaunsilor Mundet Banat.