Berindik ari pemayuh etnik, Sarawak ngembuan pengeraja asal dipeturun

0

KUCHING: Sarawak ti diuan 28 pupu raban bansa ngembuan pengeraja dipeturun nyengkaum jaku, sastera, adat, artifak sereta kraf lalu nya patut dipansik, dijaga sereta digaga dokumen ngambika enda midang ngapa.

Menteri Pengintu Pengelantang Pendiau, Orang Indu enggau Pemansang Ruang Bilik Datuk Fatimah Abdullah madah udah datai maya iya ngaga pengeraja peturun ba sida ke bepengelandik dalam mayuh macham pekara ke kreatif tauka saintifik.

“Baka jaku peribumi, adat, surat, kraf jari, pekara seni, pengawa betanam betupi, pelajar, sejarah, adat, ubat, muzik, filisofi, psikologi enggau dagang temuai.

“Semua pekara ke ditemu tauka digaga sida ke bepengelandik ari menua tu ke berat ba mensia mayuh patut dipaten, ditentuka hak cipta sereta hak intelek ngambika iya diempu nyadi hak komuniti kitai empu,” ku iya.

Iya madah bansa nya lebuh bejaku ba atur pengawa bejadika ‘Program Penerbitan Berpakej Kearifan Tempatan Sarawak 2014’ ti diatur ulih Dewan Bahasa dan Pustaka (DBP) Sarawak ditu, kemari.

Sama bisi ngulu atur pengawa nya, Kepala Direktor DBP Sarawak Datuk Dr. Awang Sariyan.

Ba atur pengawa nya mega, Fatimah madah ‘kearifan tempatan’ mega patut dipeda dalam konteks ke berat ke jemah ila, ngambika tau nyadi penemu baru sereta ngaga pekara nya  kontemporari lebih agi dalam pengawa negapka kearifan ke bisi diatu ke rebak jemah ila.

“Baka ke ditemu kitai, Sarawak sebuah menua ke ngembuan mayuh macham ‘khazanah kearifan’ ari menua tu empu ke mayuh bedau dibantai lalu bedau digaga nyadi dokumen ngambika ulih dibacha ulih komuniti Malaysia sereta di menua luar.

“Ketegal nya, Perintah Menua udah ngemendarka ungkup urung RM215,690 ngambika DBS Sarawak ulih ngaga program berpakej ‘Pelestarian Kearifan Tempatan Bahasa Sukuan Sarawak’,” ku iya.

Iya madah, DBP Sarawak nyadi sebuah palan penemu ngembuan tanggung pengawa ke berat dalam pengawa pansik, ngaga dokumen sereta ngerembaika penemu.

Kelimpah ari nya, iya madah Perintah Menua mega terus meri sukung kena beratika pengawa ke digaga ulih DBP Sarawak ulih mai asil ngagai renggat nangkan nya nyengkaum ngagai dunya antarabansa lebuh kitai mandangka penegap bansa kitai.

Sebedau nya, Awang Sariyan madah, dalam pansik DBP, ditemu bisi lebih 30 jaku menua tu tauka jaku pupu bansa peribumi di menua tu ke patut dijaga sebedau iya punas bansa nya baka ke nyadi ba beribu jaku bukai di serata dunya tu.

“Berindik ari tu, DBP belabuh ngaga ‘Program Penerbitan Berpakej Kearifan Tempatan’ taun nyin tadi lalu naka kediatu lebih 100 panel penulis dalam mayuh macham pekara nyengkaum sastera tauka pengawa nulis kreatif udah belabuh digaga enggau pengarang DBP,” ku iya.

Bekaul enggau pekara nya, iya beterima kasih ngagai Perintah Menua laban udah ngemendarka geran kena ngaga projek tu, ke dijangka deka mantu DBP nyelak bup tu lalu nyapai pengeluar bup ke disadang dalam 30,000 buah manggai 2020.