SIBU: Gerija Anglikan St John’s Extension Centre (GASJEC) Sibu Jaya deka ngatur Pengerami Makai Lemai Mantar Gawai Dayak seraya ngulihka belanja kena 26 April ba Restoren Sheraton, berlabuh pukul 7 lemai.
Chairman pengatur pengerami nya, Umpie Awi madah, belanja ke digumpul ari pengerami makai lemai nya deka dikena meli sebidang tanah endur Gerija Anglikan Sibu Jaya ngaga gerija baru.
“Diatu kami nyuwa ba ringkat satu ba Palan Komersil Sibu Jaya, ke alai palan nya mega alai kami besembiang Hari Minggu sereta bejalaika atur pengawa bukai. “Palan nya mit sereta semina muat endur 100 iku aja, taja pan ngelama tu urung 200 iku ke datai besembiang kia.”
Raban Keristin ke suah datai besembiang ngagai SJEC di Sibu Jaya nyengkaum ari Naman, Rascom Camp, Kem Batu 14, Kemuyang, Durin enggau sekeda endur bukai.
“Ba pengerami ke sebaka ti diatur taun seiti nyin tadi, kami mujur ngumpul urung RM20,000. “Juluk ati kami taun tu deka ngumpul RM30,000,” pia ku Umpie.
Iya nyadang urung 550 iku datai ngulu pengerami makai lemai nya nyengkaum ari Bintangor, Sarikei, Saratok, Debak, Betong, enggau ari sekeda di serata menua Sarawak. Pengerami makai lemai nya dipelaba dipenyadika Sapit Menteri Pemansang Menua Pesisir enggau Kandang Menua, Datuk Alexander Nanta Linggi.
Umpie mega meransang raban keristin ngelakuka penyerakup nengah pengerami makai lemai nya.