KUCHING: Sapit Presiden PKR Azmin Ali (gambar) madah, menua Sarawak enggau Sabah mengkang tinggal ari segi pemansang enti dibanding enggau Semenanjung Malaysia.
Ku Kaban Parlimen Gombak nya, pekara tu enda patut nyadi laban kededua menua nya kaya enggau pengeraja asal.
Ku iya PKR, seruran deka ngelaban ngambika ulah penyiping maya beduaka pemansang nya ulih dikemetulka.
“Kami sayau ke menua Malaysia lebih Sarawak ke kaya enggau asil kayu ramu sereta pesaka asal bukai. Nya alai kami deka nentu, semua nya dipulaika baru ngagai rayat nitihka chara agih ke betul,” pia ku iya bejaku ba aum enggau pengarang berita kena Hari Enam tu tadi.
PKR mega deka negika pengelurus ari segi pelajar sereta beduaka asil.
“Kami deka meda bala anak kita diberi pelajar ke bekualiti ukai semina di Sarawak aja, tang mega di Sabah enggau Semenanjung Malaysia,” pia ku iya.
Nengah awak nya, Azmin madahka diri enda lantang ati enggau ulah Mandal Presiden Perkasa Datuk Zulkifli Noordin ti ngeleseka pemarai ex-Presiden DAP, Karpal Singh.
“Penerang ke dipansutka ex-Kaban Parlimen Kulim-Bandar Baharu nengah tweeter nya, ukai ulah ke manah,” ku iya.