SIBU: Seiku lelaki ngetatka pemedis pengudah ditumbuk ba kening ketegal nabanka manuk sabung orang.
Nitihka ripot polis, dulu agi ari nya, kira pukul 5.15 lemai, seiku lelaki, 56, tekenyit bendar pengudah nemu seiku manuk sabung ke ditambat enda jauh ari kelang sabung di Pasai Siong lenyau kena Hari Minggu tu tadi.
Manuk sabung nya dipadahka deka dijual iya.
Nyau kelama rerigau ngiga sebelah kelang nya dia bala bakih bukai madah ngagai iya bisi seiku lelaki dipeda baka ke naban manuk sabung ke digiga iya.
Ninga munyi nya, iya beguai ngiga ngena mutosikal lalu tepedaka dua iku lelaki kira umur 30 lebih taun benung ngaduka mutosikal ba tisi jalai.
Datai dia, iya tepeda seiku ari seduai nya benung megai seiku manuk baka manuk sabung iya ke lenyau.
Taja iya keras madah manuk nya manuk sabung iya tang seduai nya mega keras madah endang manuk sabung seduai.
Nyau enda liat ati iya lalu mukut seiku ari seduai nya lalu ngambi baru manuk sabung iya.
Seninjik bendar bala bakih bukai bisi nitih ari belakang lalu ngerara laya sida tiga.
Taja udah bulih manuk sabung nya baru iya berasai enda lantang ati laban seduai nyin madah deka ngemediska iya nyema betemu baru jemah ila.
Nangika pengelikun diri, iya lalu ngaga ripot polis tengahari kemari.