NADAI PENANGGUL: Naroden (empat ari kiba) nyirap kek ngelaika penumbuh Chapel St Mark ti Ke-31Taun enggau Abun (ari kiba), Jak ari (kanan), Anthony sepiak kanan Jak seraya dikemata kaban komiti bukai.
SIMUNJAN: Menteri Muda ba Opis Kepala Menteri (Pemansang Dagang Bumiputera) Datuk Mohd Naroden Majais madahka diri nadai penanggul bejadika pengerami di gerija, taja pan iya Islam.
Ku iya, perintah menua tu nyukung penemu bebatak asur sereta pemereti ati ba jalai pengarap enggau pupu raban bansa bukai.
Ku iya, leka jaku ‘Allah’ ke dikena jalai pengarap bukai nya nadai kala nyadi penanggul di menua tu.
“Taja pan aku IsIam tang gaga ati bejadika pengerami ba gerija begulai enggau raban keristin ditu. Aku nadai ngasaika diri bisi penangguI laban pekara ke besai agi reti iya nya begulai sereta begempung enggau semua peranak menua ngambika pengidup kitai sama bela lantang sereta likun,” ku Naroden.
Iya bejaku munyi tu lebuh bejadika Hari Easter enggau penumbuh Chapel St Mark ke-31 ba Genturung Pendiau Gayau Tinting Tuba, kena malam hari Enam nyin tadi.
Naroden, ke mega Menteri Muda Pengatur Pengeraja Asal madah nadai pupu raban bansa majoriti di menua tu, nya alai ngemendarka rayat rayat di menua tu bejalaika jalai pengarap sida empu.
“Nya alai kitai anang ngemaruhka bansa bukai sereta nempa penanggul ti bekaul enggau jalai pengarap,” pia ku Kaban Kunsil Nengeri Simunjan nya, seraya madahka ulah ke bebatak asur sereta pemereti ati patut ditanka belama di menua tu.
Ku iya baru, pengawa ke jadi melaki bini enggau bansa bukai, ukai pekara ke baru nyadi di menua tu. Nya dikearap ulih ngemanahka kaul ba pupu raban bansa.
Ku iya, atur pengawa ke diatur peranak menua nya ulih dikena ngempung semua, seraya meransang sida ngena atur pengawa di gerija enggau atur pengawa pelajar ngedutka kaul ba peranak menua nya enggau peranak rumah panjai bukai ke diau semak enggau sida.
Lebuh ke ngenang sentang pekara bukai, iya meransang rayat ngemansangka tanah NCR sida enggau utai tanam komersil baka sawit.
Ku iya, ba pengidup dalam dunya ke moden diatu, rayat patut berundingka chara dikena nyungkak tikas pengidup sida ngambika setipak enggau juluk ati perintah ke deka meda rayat mansang.
“Lebuh perintah majak ngemansangka perengkaguna baka jalai alun, rayat patut berundingka chara nyungkak pengidup diri nyengkaum ngemansangka tanah NCR sida nengah jalai dagang,” pia ku iya.
Nengah awak nya, iya ngungkupka geran RM15, 000 ngagai Chapel ngambika bisi dikena ngaga jalai tama nuju gerija nya.
Sama bela bisi ngulu pengerami nya, Temenggung Anthony Nyipa, Tuai Rumah Abun enggau sab-deacon Jak Antula.