Wong: Sukung bansa China ba PR semina ngerugika sida

0

MIRI: Raban bansa China di nengeri tu patut nemu diri enda ulih mantu penyakal tauka Pakatan Rakyat (PR) merintah nengeri tu, taja pan menang ba semua penuduk ti diuan majoriti pengundi bansa China.

Menteri Wang II, Dato’ Sri Wong Soon Koh  (gambar) madah, 25 nyentuk ke 30 peratus sitak ke tebal diuan pengundi bansa China iya nya ba kandang mengeri, lalu 70 peratus di pesisir pasar enggau menua pesisir tebal diuan pengundi Bansa asal ke terus nyukung Barisan Nasional (BN).

“Nama guna 25 nyentuk 30 peratus penuduk ke  dimenang penyakal enti raban bansa China terus meri sukung ngagai sida baka ke udah nyadi ba pengawa bepilih ke sebedau tu?

“Nadai ulih dikereja kitai laban aku pechaya, BN nengah sukung ke manah ari bansa asal tetap ulih menang sereta merintah menua, ke alai sekali agi (enti pekara ke sama nyadi ba pengawa bepilih  baka ke udah) kitai nadai pengering bejaku ba perintah,” pia ku iya.

“Pengundi lebih agi raban bansa China patut nemu pekara tu,” ku iya.

Wong ke mega Menteri Kandang Menua enggau Pemansang  Komuniti madah, enti pekara tu diteju, raban bansa China deka bepechah nyadi dua raban ketegal enda sepenemu, tau ngujungka raban nya enda sepemerat dalam politik.

“Kami deka begempung enggau bansa bukai sereta nyeliahka bansa ari bepechah ke nyadi chara politik nya majak nyadi ba pengawa bepilih kunsil nengeri ke dudi tu ila,”pia ku iya.

Wong bejaku munyi tu lebuh bejadika Pengerami Makai Lemai Ninting Taun beserimbai enggau pengawa besumpah mangku pengawa nyadi komiti exco-Gempung Serakup China (FCA) Sarawak Bagi Menua Miri ke diatur ba sebuah hotel ke tebilang ditu, malam ensana.

Wong ngulu pengerami nya ngarika Kepala Menteri Sarawak, Tan Sri Adenan Satem.

Ku iya, taja pan FCA ukai sebuah serakup politik tang sida patut nemu gaya politik ke nyadi ngelingi sida.

“Utai ke nyadi diatu iya nya, gaya politik ke enda manah majak nyadi. Seraka politik ke nyadi ba bansa China enggau Bansa Asal ukai pulaika pemaik ngagai pupu raban bansa di Sarawak,” pia ku iya.

Iya minta raban bansa China sama bela angkat sereta nyingkang ngagai arus politik ti betuaika BN, seraya nyaup BN menang lalu pulaika semua penuduk ke udah diempu penyakal sebedau tu. Nengah chara nya mega ulih ngemuntaka pengingin Pakatan Rakyat (PR) ke deka merintah menua tu dalam kandang 10 tauka 20 taun ke dudi tu ila.

Ku Wong nandu, raban bansa China di nengeri patut nemu, penyakal ke udah diberi peluang kenyau ari lima nyentuk ke 10 taun ke udah, nyentuk ke diatu nadai ulih ngaga nenama tang semina ulih meransang rayat ngambika ngelaban perintah.

Wong mega meransang serakup enggau organisasi bansa China bukai sama bela berundingka chara kena ngenegapka penyerakup, kerejasama sereta pemereti ati ba raban bansa China di nengeri tu bergulai enggau 26 raban etnik di Sarawak baka Melayu, Melanau, Orang Ulu, Bidayuh, Iban enggau bansa bukai.

Ku iya, sida mega patut ngedut kaul enggau dunya luar sereta menua bukai kena nyungkak pengelantang sereta ngenegapk ekonomi, ukai semina ke diri empu enggau bansa aja, tang mega nengeri enggau menua Malaysia.