BEPEDUA PENGUNTUNG: Adenan (lapan ari kanan) ngarika Opis Zakat Sarawak nerima ‘zakat’ ari Mangsor seraya dikemataka pemesai opis perintah enggau Bank Rakyat bukai maya atur pengawa nya.
Ari lebih RM169 juta asil dagang nya, RM2,390,689 diungkup ngagai ‘zakat’ ti disua ngagai Kepala Menteri
KUCHING: Sarawak sebagi ari enam nengeri di Malaysia ke endur Bank Rakyat teulihka mayuh untung beresi ari operasyen dagang bank nya
Kaban Kaunsil Direktor Bank Rakyat Malaysia, Dato Mangsor Saad madah, ari semua pampang Bank Rakyat di serata Sarawak, penyampau asil dagang ke diulih bank nya manggai RM2,390,689.
Iya madah, taun 2013, penyampau untung beresi dagang Bank Rakyat pampang Sarawak, manggai RM169,177,900 lalu ari penyampau nya, ‘zakat’ ke dikira manggai RM2,390,689.
“Sarawak sebuah ari enam nengeri di Malaysia ke teulihka mayuh untung beresi dagang. Ngenuluka rintai enam nengeri tu iya nya Selangor (RM330 juta), Wilayah Persekutuan (RM259 juta), Johor (RM204 juta), Sabah (RM204 juta) enggau Sarawak RM169 juta,” ku iya.
Iya madah munyi tu pengudah betemu enggau Kepala Menteri Tan Sri Datuk Amar Adenan Satem nyerahka ‘zakat’ RM2,390,689 nengah Kepala Menteri ungkup Opis Zakat Sarawak di Majlis Islam Sarawak (MAIS) di Opis Kepala Menteri di Wisma Bapa Malaysia, kemari.
Iya nandu, taun tu (2013), penguntung kasar Bank Rakyat ari serata menua Malaysia manggai RM6.07 billion lalu untung beresi sebedau ‘zakat’ enggau chukai, RM2.13 billion lalu untung beresi R1.91 billion.
“Ari penguntung beresi, kami (Bank Rakyat) udah ngeluarka dividen 15% ngagai pemegai saham ke udah dipadah bedau lama tu tadi,” ku iya.
Iya madah naka ke ditu, penyampau untung agi ulih tan baka taun siti nyin suba.
Ku iya, baka taun 2012, taja pan taun nya gaya ekonomi enda berapa manah, tang Bank Rakyat agi ulih ngetanka penyampau untung beresi RM2.1 billion lalu taun 2013 bisi nambah mimit manggai RM2.13 billion.
“Reti nya, taja pan sekeda taun nya, gaya ekonomi enda berapa manah, tang kami ulih nyapai penuduk dagang ke manah,” ku iya.
Ungkup 2014, iya madah, Bank Rakyat ngarapka ulih nyapai prestasi operasyen ke manah baka taun ke udah.
Bank Rakyat ngembuan 145 buah pampang di serata menua, lalu di Sarawak bisi 14 pampang enggau sebuah Ar-Rahnu (Pajak Gadai Islam).
Sama bisi ngulu atur pengawa nya kemari, Ketuai Teknologi Pemadah enggau Operasyen Bank Rakyat Datuk Rahim Yunus, Menteri Muda di Opis Kepala Menteri (Pekara Islam) Datuk Daud Abdul Rahman, Yang Dipertua Kaunsil Islam Sarawak Datu Putit Matzen, Menijar Besai Tabung Baitulmal Datu Abg Mohd Shibli Abg Mohd Nailie enggau Penulung Mandal Presiden Pengawasan Syariah Bank Rakyat Mohd Zaki Ibrahim.