KUCHING: Raban pengelikun ke gawa maya menua siga mengkang ngarapka perintah terus gerah jari meri bantu jemah ila, baka bantu khas nengah Tabung Amanah Warisan Polis (TAWP).
Nya ukai semina dikena ngenang tauka ngelai pengawa raban nya ti berambunka nyawa ngetanka menua ari diserang kominis tang dikena nentuka pengelantang pendiau dikemerat.
Lebih agi raban ti bebadi, bakal lalu timpang pendiau ketegal betempuh enggau kominis, ti endang patut sereta amat begunaka bantu nya.
Medang Tamin, 60, ari Kampung Jirok Simunjan lebuh dikerandau pengudah nerima bantu khas TAWP di Indu Opis Polis Pelilih Menua Padawan (IPD Padawan) di Siburan kemari madahka diri gaga ati ke perintah ti agi beratka raban pengelikun ke gawa maya menua siga menya.
Iya ti pinchin taun 2012 ba pengerami nya kemari nerima chek RM1,000.
Nitih ku Medang, maya menua siga suba iya kala gawa di Kem Semuja Serian sebedau nyadi julurlatih di Bukit Siol Training School.
“Aku enggau gaga ati beterima kasih ngagai perintah laban ti meri bantu baka tu, ngarapka dudi hari ila pekara ke sama ulih terus diberi ngagai kami.
“Bantu RM1,000 ke diterima aku seharitu disimpan ke guna dudi hari.
“Lalu ngagai bala raban ti bedau nerima bantu nya (sekalika RM1,000 tauka RM3,000) patut liat ati nganti laban perintah tetap meri bantu nya tang berenggat,” ku iya lebuh dikerandau pengarang berita kemari.
William Awek, 72, lebuh dikerandau ba pengerami ti sama madahka diri nyadi raban polis megai pangkat koporal nentuka pengelikun orang mayuh.
Iya madahka diri gaga ati nerima bantu ari perintah ti ngenang penusah enggau pemedis ngetanka pengelikun menua maya menua siga kelia.
Iya berengkah masuk dalam raban pengelikun kena 1 Jun 1966 ngagai 1995 udah gawa di Batu 10, Tapah sereta pinchin di Siniawan Bau.
“Maya nya suba (menua siga) kami endang bebendar ngetanka menua nentuka pengelikun mensia mayuh, tanggunpengawa endang nulung orang mayuh nulung orang genturung pendiau.
“Taja pinchin tang terus nyukung perintah laban meri bantu nentuka pengelantang raban bepinchin,” ku iya seraya madahka diri agi nganti bantu khas RM1,000 ke bedau diterima.
Bantu khas TAWP nya kemari disuaka Mandal Ketuai Polis IPD Padawan, DSP Yap Fui Lee.