DIKELAI: Uggah ngelai pengawa bejadika Palan Phytonutrients SOP nya ngena sain ba plaks seraya dikemataka Ling (kiba) sereta sida bukai.
Nengah tengkebang pengelandik, industri tu mega ulih ngeluarka asil bukai, ku Uggah
BINTULU: Industri Sawit Sarawak diatu ba singkang ke betul nengah pengawa numbuhka Palan ‘Phytonutrient’ keterubah ditumbuhka Green Energy Sdn Bhd, anak kompeni Sarawak Oil Palms Berhad (SOPB) di Tanjung Kidurong Bintulu Sarawak.
Tu ulih nyaup ngerembaika pemansang menua Sarawak nengah chara nyendiaka produk ke bepengerai asil ari ngulihka phytonutrient.
Menteri Bekebun Bedandang Besai enggau Komoditi (MPIC) Datuk Amar Douglas Uggah Embas madah, minyak sawit nya mayuh guna ke alai mayuh produk ulih digaga ari nya.
“Opis Menteri tu berasai gaga ati laban menua Sarawak ukai semina ulih betanamka sawit sereta ngulihka minyak pakai tang mega ulih ngeluarka asil bukai berindik ari industri nya. Tu meh pekara ke diperansang kami ba industri betanam sawit,” pia ku iya ba aum enggau pemberita pengudah bejadika pengerami nasih tanah palan Phytonutrient ba Estet Industri Kidurong Phase 2 kemari.
Perintah deka majak meri semua sukung kena nentuka pemansang pekara nya dalam industri sawit di menua tu.
Ku Douglas, projek nya dipejalai nengah Palan Pemujur Ekonomi Bansa (NKEA) ti ngemeratka pemansang ba pekara pemakai enggau pengerai ke alai menua Malaysia ngembuan juluk deka nambahka pemansut nya ba makit pemakai enggau pengerai dunya.
Kompeni ti bisi kaul enggau program tu ulih nerima bantu ari perintah.
Ba sekeda kes, perintah udah nambahka ungkup belanja RM15.63 miliun kena nyukung SOP projek Palan Phytonutrient, ke alai semua ungkus ngaga palan nya RM80 milliun.
“Tu setipak enggau singkang industri ke udah mayuh betapi enggau pemar, lalu apin lama ke udah mega betapi enggau penanggul enggau raban NGO ari menua tasik. Kitai nadai penanggul enti kitai nyual CPO. Nya alai kitai nguing ngagai pengawa betanam bukai, nambika kitai ulih ngemansutka produk nya,” pia ku Douglas.
Ku iya, perintah ngasaika sebengkah chara kena mantu ngemansang semua ekonomi iya nya nyendiaka pengawa puang sereta nyendiaka bantu ngagai orang ke betanam sawit lebih agi ti betanam nengah chara mit.
Ku iya, kompeni nya mega deka ngemansutka biodiesel ke menua Sarawak, laban peminta ba utai tanam ti ngemansutka nya deka ditumbuh ujung bulan Julai.
“Sebedau nyual biodiesel, sida ulih ngemansutka utai ke manah ari minyak, udah nya baru ngeluarka phytonutrient baka karotin enggau vitamin E.
“Kena bulan Ogos taun tu, menua Sarawak deka bejalaika program B5, ke alai enti kita meli minyak diesel sepengudah program nya dipejalaika, lima peratus minyak diesel asil ari sawit,” ku iya.
Palan Phytonutrient deka ditumbuhka besepiak enggau SOP Edible Oils sereta disadang tembu gaga tengan taun 2015.
Kaunsil Minyak Sawit Malaysia (MPOB) mega bisi nyain sempekat enggau sekeda kompeni bukai baka Adeka Food (Asia) Sdn Bhd enggau Felda Global Ventures Holding Bhd.
Adeka Foods deka deka bejalaika projek dagang ke bekaul enggau ‘premium specialty fats’, lalu Felda Global ke begempung engagu Lipid Ventures Sdn Bhd deka ngemansutka produk ‘tocotrienols’.
Kompeni bukai ti bisi malutka diri ba NKEA minyak sawit ti ngeluarka produk pemakai enggau produk pengerai iya nya Davos Life Science Sdn Bhd enggau Carotino Sdn Bhd.
Projek dagang enggau gred ke pemadu tinggi ‘tocotrienols’ enggau ‘isomer’ kompeni Davos Life udah tembu, tang phytonutrients ari kompeni Carotino benung ba tikas ke penudi endar ba pengawa begagaka kilang proses.
‘Phytonutrient’ ke mega dikelala enggau nama phytochemicals sebengkah utai tumbuh ke ditemu ba utai tanam. Utai tu mayuh guna nyengkaum mantu nyaga utai tumbuh. Ambika chunto, phytonutrient nyaga utai tumbuh ari UV radiation lalu bisi mega nyaga ari dikachau indu utai.
Phytonutrient tu ukai semina nguntungka utai tumbuh tang mega orang ti rindu makai nya. Iya mega ulih nyaga pengerai ari segi ‘antioxidant, anti-inflammatory, enggau liver-health’.
Kilang SOP berengkah bejalaika operasyen kena 14 Julai 2012, ke bejalaika pengawa nyarap Minyak Sawit Mata (CPO) nganchur isi sawit sereta nyarap, meresi sereta muai bau minyak sawit, RBD Olein, RBD Stearin and Palm Fatty Acid Distillate (PFAD), muai kerubung leka sawit sereta nyarap isi minyak ari leka sawit (CPKO).
Sama bela bisi ngulu pengerami nya Chairman Eksekutif SOPB, Tan Sri Datuk Ling Chiong Ho, Ketuai Pemesai Eksekutif gerup Paul Wong Hee Kwong enggau Ketuai Pemesai Operasyen Eric Kiu Kwong Seng.
BEJADIKA PALAN: Uggah (duduk dalam ekskavator) bejadika pengawa nasih tanah endur ngaga Palan Phytonutrients SOP. Bela bisi ayan dalam gambar tu (ari kiba) Ling, Kiu enggau Wong.