Sitak pegai IPD Padawan enda mayuh penyalah berat: Yap

0

KUCHING: Indu Opis Polis Pelilih Mit Padawan (IPD Padawan) tebal agi betapi sereta rikod kes churi perengka pengangkut lalu pemadu mimit kes penyalah berat.

Pekara nya dipadahka Mandal Ketuai Polis, IPD Padawan DSP Yap Fui Lee lebuh dipinta meri penerang bekaul enggau kes penyalah ngelanggar undang-undang di kandang menua Padawan.

Iya madah, IPD Padawan ti mungkur semua raban polis, deka seruran bejalaika mayuh chara dikena mutar sereta ngurangka kes penyalah ngelanggar undang-undang di kandang menua nya.

“Ba kandang menua Padawan ditu kami mayuh agi ngerikod kes enchuri perengka pengangkut, lalu pemadu mimit kes penyalah berat ti ulih diputarka kami.

“Enti kes enchuri perengka pengangkut nya mayuh agi bekaul enggau kes enchuri motosikal dibandingka enggau kereta ti pemadu mimit.

“Dikena ngurang sereta mutarka kes enchuri perengka pengangkut tu kami bisi bejalaika ops lejang khas, ari nya kami ngatur pengawa nyekat jalai sereta nyidi orang ti ngereja penyalah nya,” ku iya ti nadai madahka statistik bekaul kes nya.

Bejaku baru ku iya, bepelasarka pansik, perengka pengangkut ti dichuri nya dibai ke menua Indonesia udah nya lalu sekalika dijual tauka dibuka ‘spare part’ sereta dikena sebelah genturung pendiau.

Taja pia iya madah, kes penyalah ngelanggar undang-undang di Padawan nunjukka pengurang dibandingka taun sebedau tu.

Kes penyalah ngelanggar undang-undang di Padawan agi kurang iya nya 27 peratus taun nyin kemari dibandingka taun tu (2014) 19.5 peratus, ari timpuh Januari ngagai seharitu (23 April), ku iya.

Dulu ari nya Yap nyuaka bantu cek Tabung Amanah Warisan Polis (TAWP) ngagai 12 iku penerima ke kala nyadi polis, balu tauka duda (polis), ti diatur ba bilik aum, IPD Padawan di Siburan, kemari.

Kelimpah ari nya lebuh dipinta ngenang raban polis indu ti dianjung bejalaika pengawa di sekula sekondari dikena mutarka kes ‘gangsterisme’, iya madahka, IPD Padawan endang bisi ‘liaision officer’ ngerapit kaul enggau sekula ti dibaruh kuasa IPD nya enggau juluk ngurangka penyalah di sekula.

“Nambahka nya kami bisi kadet co-op polis di 12 sekula dibaruh pegai IPD Padawan,” ku iya.