SME Corp. mujur ngatur licha ungkup kaban DCCI

0

KUCHING: Kaban Balai Dagang Dayak enggau Industri (DCCI) sereta kaban balai dagang begulai enggau lebih 20 buah Industri Mit enggau Tengan Pemesai (SMEs) udah ngulu licha diatur SME Corporation ba indu opis nya empu, Tingkat Tiga Menara Grand, kemari.

Entara pekara dipejuaraika maya licha nyengkaum ‘Human Resource Development Fund (HRDF)’, ti di baruh kuasa ‘ACT 2001 ACT 612’ sereta udah dipejalai kenyau 16 May 2001.

Nengah Akta HRDF, diberi mandat ngumpul levi ari pengaji ti ulih dirijista (kompeni korporat) ti nyengkaum sektor pengaga enggau servis.

Naka ke diatu bisi 6,949 pengaji dalam sektor pengaga lalu 7,163 pengaji dalam sektor servis ti berijista enggau HRDF.

Nitihka penerang berita kemari, tuju HRDF nya nyengkaum dikena ngenegap sereta ngemanahka agi pengelandik, penemu enggau penau raban pengereja pengawa; nambahka peminta pengereja pengawa bepengelandik nengah ‘apprenticeship scheme’, skim latih industri, skim latih pengereja pengawa jemah ila kelimpah ari nempa pengereja pengawa bepengelandik dalam Teknologi Pemadah (IT).

Pengelicha keterubah,Executive Officer HRDF Husny Mubarak madah HRDF gaga ati ulih mantu pengaji dalam pengawa ngelatih sereta ngangkatka pemanah pengereja pengawa nitihka atur enggau pengulih dipelanja dibaruh dana.

Nambahka nya seiku agi pengelicha, Sapit Direktor Jabatan Tenaga Kerja Sarawak Nur Huda Mohd ngenang pasal ‘Minimum Retirement Act 2012’ iya nya pengaji enda diasuh ngetuka pengereja pengawa sebedau manggai umur 60.

Pekara bukai ke bisi dikenang nyengkaum undang-undang buruh enggau industri di Malaysia.

Bisi datai ngulu licha nya Direktor SME Corporation Sarawak Ursla Thomas enggau ke bukai.